Botë
Shpërthen vullkani në Kili
23.04.2015 13:39
Vullkani Kalbuko në jug të Kilit ka shpërthyer dy herë brenda pak orëve, duke dhënë sinjalin se është zgjuar nga gjendja e fjetur prej disa dekadash...
Pamjet filmike nga zona tregojnë një vërshim llave dhe hiri që është ngritur disa kilometra në ajër. Autoritetet kanë shpallur alarmin e kuq dhe kanë evakuuar mbi 4 mijë persona në një rreze prej 20 kilometrash.
Vullkani Kalbuko është një nga më aktivët në Kili, por shpërthimi i tij pas një gjendjeje të gjatë pasiviteti i ka kapur të papërgatitura autoritetet.
Alejandro Verges, një zyrtar i emergjencave në rajon, tha se vullkani nuk kishte qenë nën një program të posaçëm mbikëqyrjeje.
Banorët në qytetin e afërt të Ensenadës, bashkë me ata të dy lokaliteteve më të vogla, janë urdhëruar të braktisin shtëpitë e tyre, ndërkohë që shkollat e zonës janë mbyllur dhe disa fluturime janë anuluar.
Qyteti tjetër i afërt, Puerto Mont, prej nga kalon rruga për në rajonin e njohur të Patagonisë, është mbuluar tashmë nga një re e madhe hiri. Pamjet e televizioneve lokale tregojnë probleme të shumta në trafik dhe radhë të gjata në pikat e karburantit.
Ndërsa qyteti tjetër Puerto Varas është në gjendje alarmi. Kryetari i bashkisë, Gervoy Paredes deklaroi se banorët janë shumë të frikësuar.
“Nuk kam parë kurrë diçka të tillë, është e frikshme. Të gjithë po pyesin veten se çfarë do të ndodhë në vazhdim”, tha një banore.
Ministri i Brendshëm, Rodrigo Penailillo u ka bërë thirrje qytetarëve që të ruajnë qetësinë dhe të jenë vigjilentë.