Vuçiqi, kritika ndaj Kurtit dhe bashkësisë ndërkombëtare

“Në 72 orët e ardhshme do t’i drejtohem opinionit dhe do të flas për atë që angazhohet Serbia, për shkak të sulmit brutal të popullsisë serbe, para së gjithash në veri të Kosovës dhe çka është ajo që e ashtuquajtura bashkësi ndërkombëtare nuk ka plotësuar, çka është ajo që Serbia kërkon dhe çka është ajo që do të bëjë Serbia. Pritet që me propozime të rëndësishme në muajin tetor të dalim edhe para Kuvendit të Serbisë. Do të kemi takime shumë të rëndësishme, patjetër të luftojmë për pozitën e Serbisë në botë, të kërkojmë aleat.”, - deklaroi presidenti i Serbisë, Aleksandar Vuçiq.   

 

Pas takimit me Vuçiqin, Lajçaku nuk ka folur për mediat. Ndërsa ditë më parë ka thënë se do të shkojë në Beograd për t’u përgatitur për takimin e radhës mes Kosovës dhe Serbisë në nivel të kryenegociatorëve. Në këtë kontekst, Vuçiqi ka thënë se Serbia është gjithmonë e gatshme për dialog, ndërsa shprehu edhe gatishmërinë për takimin e radhës me kryeministrin, Kurti. Gjatë vizitës paraprake në Prishtinë, Lajçaku ka thënë se është arritur pajtueshmëri për raundin e ri të dialogut mes kryenegociatorëve, Besnik Bislimit dhe Petar Petkoviqit, mirëpo nuk ka dhënë hollësi se kur do të zhvillohet takimi.