Propozim-ligji për qeverisje lokale, deputetët diskutuan fatin e tri komunave

 

“Nëse arsyeja është për të kursyer, atëherë nuk mund që në të njëjtën kohë të kemi katër ministri të reja, për të cilat nevojiten financa, ndërkaq nga ana tjetër qytetarëve t’iu shkurtohet e drejta kushtetuese dhe demokratike të zgjedhin kryetarët e tyre.”, - deklaroi deputeti i LSDM-së, Dimitar Kovaçevski.

 

“Përse tani kur Timço Mucunski është ministër i Punëve të Jashtme, qytetarët nuk kanë të drejtë sërish të zgjedhin kryetar komune? Ju po goditni të drejtën kushtetuese të qytetarëve që të zgjedhin përfaqësuesit e tyre në zgjedhje demokratike.”, - deklaroi deputeti i “Së Majtës”, Amar Mecinoviq. 

 

Nga VMRO – DPMNE-ja s’lëvizin nga qëndrimi se i gjithë ligji është ngritur për të kursyer para nga buxheti.

 

“Është më mirë që ato dy, tre milionë euro të cilat do t’i shpenzonim për zgjedhje, të cilat do të vlejnë vetëm gjashtë muaj, t’i investojmë në komuna, në shkolla, kopshte fëmijësh, në objekte kapitale, se sa t’i hedhim këtu.”, - theksoi koordinatori i VMRO – DPMNE-së, Nikolla Micevski.

 

Për arritjen e 80 votave të nevojshme për miratimin e ligjit, vendimtare do të jenë votat e deputetëve të “Frontit Evropian”. Ligji i propozuar nga shumica parlamentare do të parandalonte organizimin e zgjedhjeve të parakohshme në Saraj, Gostivar dhe Aerodrom në fillim të vitit të ardhshëm, pasi në tetor të vitit të ardhshëm vijojnë zgjedhjet e rregullta lokale. Këto tre komuna, menaxhohen nga ushtrues detyre, pasi dy kryetarë pas zgjedhjeve parlamentare morën funksione ministrash, ndërkaq i treti u zgjodh deputet.