Kthehet në rigjykim lënda për vulat e ASh-së, Taravari: Partia kthehet në anëtarësinë e saj

 

“Gjykata e Apelit e kthen lëndën në rigjykim pas vendimit paraprak që solli Gjykata Themelore në Tetovë, ku ajo zvarritej dhe u ndërruan disa gjykatës derisa u mor edhe vendimi skandaloz me presion nga ish-ministri i Drejtësisë, Krenar Lloga, që vulat e partisë t’i takojnë fraksionit që iu bashkua BDI-së. Duke marrë parasysh dëshmitë e deponuara pranë Gjykatës së Apelit në Gostivar, vendimi final pritet që të jetë në favor tonin dhe partia së bashku me vulat të mbeten te kryetari legjitim i saj, Arben Taravari.”, thuhet në njoftimin me shkrim të ASh-së, krahu i Taravarit.

 

 

Ndaj këtij vendimi ka reaguar ish-ministri i Drejtësisë, Krenar Lloga, duke thënë se kjo çështje nuk ka përfunduar. 

 

“Edhe pas presionit të Taravarit dhe padronit të tij, ai nuk ka fituar lëndën rreth “vulave të ASh-së”. Lënda rreth legjitimitetit të Aleancës për Shqiptarët është kthyer në rigjykim në Gjykatën Themelore të Tetovës.”, ka reaguar Lloga në rrjetin social Fejsbuk.  

 

Kontesti mbi pronësinë dhe vulat e ASh-së nisi kur Taravari vendosi t’i bashkohet koalicionit VLEN dhe të mos jetë pjesë e “Frontit Evropian”. Gjatë procesit të gjykimit në Tetovë u ndryshuan disa gjykatës.

 

Pas kësaj, Taravari akuzoi për presion ndaj gjyqësorit, ndërsa Sela i ishte përgjigjur se po manipulon për të arsyetuar vendimin e tij të gabuar për t’u rreshtuar aso kohe me opozitën shqiptare.