VLEN: Akuza të reja për abuzim nga ish funksionarë

Bujare Abazi nga Koalicioni “VLEN”, ka publikuar akuza të reja për keqpërdorim të buxhetit publik nga funksionarë të mandatit të kaluar.  Sipas Abazit, BDI-ja i ka përdorur mjetet e buxhetit publik si sirtar privat për të ushtruar ndikim politik, dhe në të cilën janë kapur të gjithë politikanët që e perceptojnë politikën si një mundësi për pasurim personal dhe familjar.

“Kompania ‘RITRON COPY DOOEL’ import-eksport Kumanovë, pronar i së cilës është nipi i bashkëshortes së deputetit Elmi Aziri, në periudhën 9 mujore, të llogaritur nga qershori 2021 deri në mars 2022, ka pranuar dy tenderë nga Ministria e Sistemit Politik dhe Marrëdhënieve mes Bashkësive në krye me Artan Grubin, kryelogjistik i Ali Ahmetit. Këta dy tenderë kanë të bëjnë me blerjen e pajisjeve informative dhe vlera e tyre totale është 2 milionë e tetëqind mijë denarë.” – tha Bujar Abazi nga Koalicioni “VLEN”.

VMRO-DPMNE: Drejtorët e LSDM-së dhe BDI-së kanë blerë barna që nuk janë në listën e Fondit

Edhe VMRO-DPMNE ka adresuar deri te qeveria e kaluar akuza për keqpërdorim të buxhetit shtetëror në fushën e shëndetësisë. 

“Gjatë kontrolleve janë konstatuar blerje të barnave që nuk janë në listën e barnave të përcaktuara me akt të përgjithshëm të Fondit të Sigurimeve Shëndetësore, për të cilat Ministri i Shëndetësisë jep pëlqimin, por për të njëjtin ISHP nuk ka siguruar pëlqim paraprak nga Ministria e Shëndetësisë dhe Fondi, edhe atë për në Qendrën Shëndetësore - Gostivar, Qendrën Shëndetësore - Strugë, Qendrën Shtetërore të Kardiokirurgjisë - Shkup, Qendrën Nefrologjike - Shkup, Qendrën Psikiatrike - Shkup, Spitalin klinik - Tetovë, Spitalin e Përgjithshëm - Strugë, Spitalin e Përgjithshëm - Strumicë, Spitalin e Përgjithshëm me aktivitet të zgjeruar - Dibër.” – deklaroi Bojan Stojanovski nga VMRO-DPMNE.

Sipas VMRO-DPMNE-së abuzime janë bërë edhe në pjesën e kujdestarisë, akuzojn se përgjegjësit në shëndetësi nga LSD dhe BDI kanë vepruar sikur klinikat dhe spitalet të ishin të tyret, pa u kujdesur për punëtorët, fondet dhe pacientët. (Sanije Duraku, TVM2)