Bashkëpunimi i partive shqiptare, Taravari: Jemi të gatshëm për bashkëbisedim

 

“Ne çdo herë kemi qenë të hapur për të biseduar për të gjitha temat e rëndësishme, kështu që asnjëherë nuk kemi refuzuar një ide të mirë. Fillimisht, ato duhet të pranojnë se janë në opozitë, të adaptohen se janë në opozitë dhe të bëjnë ftesë. Kur të bëjnë ftesë ose ne mund t’u bëjmë nëse kanë diçka të rëndësishme që mendojnë se duhet ta bisedojmë, jemi të gatshëm të ulemi të bisedojmë me gjithsecilin.”, - deklaroi ministri i Shëndetësisë, Arben Taravari.

 

 

Taravari iu kundërpërgjigj ftesës publike të Zijadin Selës nga “Fronti Evropian”, që forcat politike shqiptare bashkërisht t’i bëjnë ballë, sipas tij, ideve dhe interesave dashakeqe të partive maqedonase. Sela konsideron se duhet të gjendet gjuhë e përbashkët që në të ardhmen të ndalohet zbatimi i planeve, që përpos shqiptarëve, përfshijnë edhe etnitë e tjera. Çështje të cilat së fundmi kanë ngjallur debat janë shfuqizimi i balancuesit, mekanizëm ky i cili mundëson përfaqësimin e drejtë dhe adekuat të shqiptarëve në institucione, shfuqizimi i neneve për përdorimin zyrtar të gjuhës shqipe, si dhe propozim-ligji për të ashtuquajturit “Branitella”, me të cilin për pjesëtarët e forcave të mbrojtjes dhe sigurisë dhe familjet e tyre të ketë rritje të vlerës së kompensimit në bazë të shkallës së invaliditetit nga 1.200 euro maksimumi si vlerë mujore, në 82 mijë euro nëse shkalla e invaliditetit është 100 për qind.