Protesta në Preshevë, shqiptarët kërkojnë barazi dhe drejtësi

 

“Kërkojmë respektimin e plotë të marrëveshjeve politike të nënshkruara mes Qeverive republikane dhe përfaqësuesve legjitim shqiptar. Kërkojmë ndërprerjen e menjëhershme të procesit selektiv etnik të pasivizimit të adresave të shqiptarëve në Preshevë, Bujanocë dhe Medvegjë dhe kthimin e të gjithë qytetarëve të pasivizuar. Kërkojmë njohjen e menjëhershme të diplomave të të rinjve shqiptar të arritura në universitetet e Republikës së Kosovës konform marrëveshjeve të nënshkruara në Bruksel dhe Uashington.”, - deklaroi kryetarja e komunës së Preshevës, Ardita Sinani.

 

Kërkesat e shqiptarëve janë të kamotshme, e kamotshme është edhe heshtja e shtetit serb, e cila e ka mohuar vazhdimisht se shqiptarët në këtë vend janë të diskriminuar.

 

Protestuesit marshuan gjithashtu pranë institucioneve duke mbajtur pankarta me mbishkrime si: “Stop pasivizmit selektiv”, “Duam libra shqip” dhe “Kthema adresën”. Ishin të veshur me fanella me mbishkrimin “Për identitet dhe dinjitet”.

 

Marshit i priu edhe përfaqësuesi i vetëm i shqiptarëve në Parlamentin e Serbisë, Shaip Kamberi. Ata ndaluan edhe pranë ndërtesës së komunës së Preshevës, ku u këndua himni kombëtar shqiptar.

 

Kjo është protesta e dytë e shqiptarëve të Luginës në dy muajt e fundit, pas asaj në Bujanoc në gusht. Sipas regjistrimit të fundit të popullsisë, shqiptarët janë pakica e katërt më e madhe në Serbi, përkatësisht në këtë shtet jetojnë 61.687 shqiptarë.