Situatë e tensionuar në Lindjen e Mesme, Izraeli thotë se ka vrarë liderin e Hezbollahut

 

“Mesazhi është i qartë. Ne do të dimë si të shkojmë te kushdo që kërcënon qytetarët e shtetit të Izraelit, në jug, në vende të largëta. Ky sulm ishte përgatitur për një kohë të gjatë dhe u krye në kohën e duhur, në mënyrë shumë të mprehtë.”, tha Herzi Halevi, shef i shtabit të përgjithshëm të forcave të mbrojtjes izraelite.

 

Betejat vazhdojnë. Disa raketa u hodhën në veri të Izraelit. Një predhë shpërtheu në det pranë Tel Avivit. Ambasada iraniane në Liban thotë se zhvillimet e fundit janë një përshkallëzim i rrezikshëm. Ata e vlerësuan sulmin në Bejrut si një krim lufte për të cilin, thonë ata, si Izraeli ashtu edhe Shtetet e Bashkuara duhet të mbajnë përgjegjësi. Uashingtoni është i bindur se ata nuk kanë asnjë përfshirje ose njoftim paraprak për një sulm izraelit në atë që ushtria izraelite thotë se është selia qendrore e Hezbollahut.

 

“Unë jam ende duke mbledhur informacione, mund t'ju them se Shtetet e Bashkuara nuk kishin njohuri apo përfshirje në aksionin e mbrojtjes izraelite. Ne duhet të zbulojmë më shumë detaje.”, tha presidenti i SHBA- ve, Joe Biden.

 

“Kam folur më herët në telefon me kolegun tim në Izrael, ministrin Gallant. SHBA-të nuk ishin të përfshira në operacionin e Izraelit. Nuk kishim asnjë paralajmërim paraprak. Thirrja ime për ministrin Gallant ndodhi ndërkohë që operacioni ishte në të vërtetë tashmë duke u zhvilluar. Unë i kam thënë disa herë se një luftë e gjithanshme duhet të shmanget dhe kjo është mënyra më e shpejtë për të kthyer qytetarët e zhvendosur izraelitë dhe libanezë.”, tha Lloyd Austin, sekretar i mbrojtjes i SHBA-ve.

 

SHBA dhe aleatët e saj në fillim të kësaj jave propozuan një armëpushim tre-javor me shpresën për të gjetur një kompromis midis palëve ndërluftuese, por Izraeli e refuzoi atë. Thuhet se Netanyahu fillimisht ra dakord me propozimin, por më pas ndryshoi mendje.

 

“Lufta në Liban mund të çojë në përshkallëzim të mëtejshëm duke përfshirë forcat e jashtme. Unë e mbështes plotësisht propozimin për një armëpushim të përkohshëm - i cili do të lejojë dërgimin e ndihmave humanitare dhe do të hapë rrugën për rifillimin e negociatave serioze për një paqe të qëndrueshme. Tani na duhet ky armëpushim. Ne nuk mund të përballojmë negociata të pafundme siç kemi për Gazën.”, tha Antonio Guterres, sekretari i përgjithshëm i OKB-së.

 

Kryeministri izraelit ndërpreu papritmas një vizitë në Shtetet e Bashkuara dhe u kthye në shtëpi pasi iu drejtua më parë Kombeve të Bashkuara duke u zotuar se fushata e Izraelit kundër Hezbollahut do të vazhdojë.