Sulmet me raketa drejt Tel Avivit, Irani: Hakmarrje për Nasrallah dhe popullin libanez

 

Garda e fuqishme Revolucionare e Iranit e përshkruan sulmin me raketa si hakmarrje për vrasjet e liderëve të Hamasit dhe Hezbollahut, Ismail Haniyeh dhe Hassan Nasrallah, gjithashtu dhe për vrasjen e popullit libanez e palestinez.

 

Ajo tha se forcat e saj ajrore kishin shënjestruar baza të rëndësishme të Izraelit dhe do të njoftonte detajet më vonë.

 

Izraeli zotohet se do t’i përgjigjet ‘fuqishëm’ sulmit me 200 raketa nga Irani mbrëmjen e kësaj të marte.

 

Zëdhënësi i ushtrisë izraelite Daniel Hagari ka thënë se Forcat Ajrore izraelite do të “godasin fuqishëm në Lindjen e Mesme” sonte, ndërsa shtoi se ngjarja e sotme do të ketë shumë pasoja.

 

“Sistemet e mbrojtjes ajrore izraelite dhe amerikane operuan në mënyrë efektive në breshërinë e raketave iraniane. Irani kreu një akt serioz sonte dhe po e shtyn Lindjen e Mesme drejt një përshkallëzimi”, thuhet në deklaratën e Hagarit.

 

Shtetet e Bashkuara kishin paralajmëruar më herët për një sulm të mundshëm me raketa balistike iraniane ndaj Izraelit dhe thanë se do të kishte pasoja “të rënda” për Teheranin.