Shëndeti mendor tek të rinjtë, shkollat të përgatiten më profesionalisht për kujdes

 

“Bëhet fjalë për një tryezë për krijimin dhe zgjidhjen sistemore të përforcimit të shëndetit mendor dhe mirëqenien e të rinjve, me fokus të veçantë në rrethin shkollor, respektivisht transformimin e rrethit shkollor, që kujdeset dhe nxit mirëqenien dhe zhvillimin më të mirë të të rinjve. Vlerësojmë se tani është koha e duhur që të ndërmerren masa konkrete në drejtim të mundësimit të shërbimeve, resurseve dhe mjeteve që të rinjtë të munden të fillojnë të kujdesen për shëndetin e tyre mendor.”, - deklaroi Filip Ifkovski nga OJQ “Të rinjtë munden”.

 

Problemet e shëndetit mendor tek të rinjtë janë në rritje, jo vetëm tek ne, por në të gjithë botën. Por, pyetja e madhe është pse të rinjtë kanë shëndet të dobët mendor? Një ndër faktorët kryesorë janë padyshim vështirësitë aktuale shoqërore, sikurse edhe kostoja e krizës së jetesës. Autoritetet e vendit tonë thonë se prej fillimit të vitit shkollor në vend janë raportuar 6 raste për dhunë nga bashkëmoshatarët. Të gjithë pajtohen se këto çështje duhen zgjidhur sistematikisht, ku të gjitha palët e involvuara do të veprojnë në mënyrë të koordinuar.

 

“Shteti ka sistem të kujdeset për shëndetin mendor e të rinjve  përmes shkollave edhe ministria ka shërbim pedagogjik, i cili është kyçur në kujdesin mendor e të rinjve. Këtë vit shkollor kemi pasur 6 denoncime për dhunë mes bashkëmoshatarëve dhe ne po veprojmë ndaj tyre. Megjithatë është me rëndësi të theksohet se është i nevojshëm bashkëpunim më i mirë ndërsektorial nga më shumë ministri dhe bashkërisht të gjejmë zgjidhje.”, - theksoi ministrja e Arsimit dhe Shkencës, Vesna Janevska. 

 

“Është e nevojshme që të bëhet bashkëpunim ndërsektorial mes ministrive, MPB-së, MPPS-së dhe Ministrisë  së  Arsimit. Ne jemi në komunikim të vazhdueshëm dhe një prej këtyre rasteve është alarmuar edhe në ministrinë tonë ku intervenuam me pjesëmarrje të një punonjësi social.”, - u shpreh zëvendësministri i MPPS-së, Gjoko Vellkovski.

 

Në vendin tonë ende nuk ka statistikë të saktë se sa është numri i të rinjve, që janë viktima të dhunës së bashkëmoshatarëve, theksuan Vellkovski dhe Janevska. U zotuan se gjatë këtij viti shkollor do të angazhohen më shumë shërbimet profesionale nëpër shkolla që të ndihmojnë në zgjidhjen e këtyre problemeve.