Aksident i rëndë në rrugën Manastir – Prilep, humbën jetën tre persona, një me lëndime të rënda

 

“Më 03.10.2024. në orët e hershme të mëngjesit më 07:51, në sektorin për punë të brendshme në Manastir është raportuar se në aksin rrugor Prilep - Manastir në afërsi të kryqëzimit Lagovë ka ndodhur një aksident trafiku në mes të automjetit të udhëtarëve “Toyota” me targa të Prilepit i drejtuar nga 42-vjeçari N.V. nga Prilepi dhe pasagjerët A.R dhe F.J., të gjithë nga Prilepi dhe një kamion “Volvo” me targa të Shkupit i drejtuar nga 51-vjeçari G.R. nga Manastiri.”, - thanë nga SPB-Manastir.

 

Nga shërbimi emergjent mjekësor informuan se e kanë konstatuar vdekjen e tre udhëtarëve, ndërsa për njërin thonë se është me lëndime trupore.

 

“Tre udhëtarët që kanë qenë në veturë kanë ndërruar jetë, njëri është i lënduar, është dërguar urgjent në spitalin e përgjithshëm në Prilep me lëndime trupore. Nga forca e goditjes, edhe vetura, edhe kamioni janë djegur. Arsye e mundshme e këtij aksidenti është shpejtësia е papërshtatshme në krahasim me kushtet e rrugës.”, - deklaroi shefi i Shërbimit Emergjent Mjekësor në Prilep, Boshe Milosheski.

 

Ekipet e Zjarrfikësve kanë punuar gjatë ditës për shuarjen e zjarrit, pasi nga përplasja e drejtpërdrejtë automjetet kanë marrë flakë.

 

“Kur erdhëm në vendngjarje pamë që nuk është vetëm kamioni që digjet, por edhe vetura nga aksidenti që kishte ndodhur, e cila ka edhe viktima. Ne po e sigurojmë hapësirën, ka edhe benzinë edhe naftë e cila ka rrjedhur, ajo është veturë hibride, shpresojmë që nuk do të shpërthejë eksploziv.”, - theksoi zëvendësdrejtori i TPPE – Prilep, Viktor Stojçevski. 

 

Ekipet e policisë dhe Prokurorisë Themelore Publike gjatë tërë ditës kanë kryer kontroll në vendngjarje, ndërsa rruga kryesore Prilep – Manastir ka qenë në ndalesë të plotë, trafiku është zhvilluar përmes rrugëve alternative. Prokurori i Shtetit ka lëshuar një urdhër për obduksionin e trupave të të ndjerëve, si dhe për ekzaminimin e mostrave të gjakut dhe urinës nga shoferi i kamionit. Gjithashtu, është urdhëruar një ekspertizë teknike e trafikut për të përcaktuar shkaqet e aksidentit.