Përmbytjet në Bosnjë dhe Hercegovinë, rritet numri i të vdekurve dhe të zhdukurve

 

“Sot në mëngjes kur u zgjova dhe dola në tarracë, kudo ishte përmbytur. Rruga për në Sarajevë dhe ajo për në Kreshevë janë gjithashtu të përmbytura. Është tmerr. Uji hyri në shtëpitë e njerëzve, gjithçka u shkatërrua.”, - tha një banor i zonës.

 

Shërbimet federale po punojnë për nxjerrjen dhe evakuimin e qytetarëve nga zonat e rrezikuara, si dhe për riparimin e dëmeve të mëdha. Është kërkuar ndihmë edhe nga bashkësia ndërkombëtare.

 

“U bëj thirrje të gjithë qytetarëve që munden, të ndihmojnë në shpëtimin e jetëve njerëzore, por edhe të mos dalin në rrugë, sepse rrugët nuk funksionojnë. Për momentin më e rëndësishmja është që të gjithë të punojmë në mënyrë të koordinuar.”, - deklaroi ministri i Financave i Zhupanisë së Hercegovinës dhe Neretvës, Adil Suta.

 

Situata më kritike është në komunën e Jabllanicës, rrugët e së cilës janë paralizuar, ndërsa nuk funksionojnë as rrjetet e operatorëve mobil.

 

“Kemi kërkuar ndihmë nga të gjitha autoritetet më të larta qeveritare, si dhe nga forcat e armatosura. Aktualisht jemi duke punuar për dërgimin e një helikopteri në mision shpëtimi për një fëmijë në Jabllanicë.”, - theksoi kryeministrja e Zhupanisë së Hercegovinës dhe Neretvës, Maria Buhaç. 

 

Për shkak të erërave të forta dhe reshjeve të dendura të shiut që vërehen edhe në Kroacinë fqinje, janë mbyllur disa rrugë.