Protesta e opozitës në Tiranë, 10 policë të plagosur, arrestohet 1 protestues

Gjatë rrugës, protestuesit i vunë flakën një stacioni autobusi dhe disa kazanëve të mbeturinave. I njëjti skenar u zbatua edhe në selinë e Partisë Socialiste, ku një seri bombash molotov u lëshuan drejt godinës dhe u vu flaka banderolës në fasadën hyrëse. Sërish policia u kundërpërgjigj me gaz lotsjellës.

 

Marshimi vijoi për disa orë në rrugët e kryeqytetit, ku mosbindja civile u përkthye në thyerje të xhamave të reklamave dhe zjarrvënie në kazanët e mbeturinave. Në fund, të paktë në numër, protestuesit u ndalën në sheshin përpara Parlamentit. Skenari edhe atje ishte i njëjtë dhe kundërpërgjigjja gjithashtu.

 

Të paktën 10 punonjës policie u dëmtuan nga sulmet e protestuesve, ndërsa autoritetet siguruan se kanë marrë të gjitha masat për identifikimin, kapjen dhe shoqërimin e personave të përfshirë në sulme mbi Policinë dhe institucionet shtetërore.