Nesër do të fillojë sezoni i ngrohjes, “Energy Ecolink” fton qytetarët të kyçen në rrjet

 

"Me fushatën tonë synojmë të kyçim edhe objekte banesore që moti kohë janë shkyçur nga rrjeti i ngrohjes. Janë gjithsej 54 objekte banesore. Informojmë se janë bërë  investime të mëdha në repartin e prodhimit të energjisë termike, në vendmatësit në ndërtesa. Përveç kontrollit të rregullshmërisë së pajisjes, është bërë edhe verifikimi i matësve nga ana e Byrosë për Metrologji, që faturat e lëshuara për energji termike të jenë të sakta, por edhe duke garantuar shërbim sipas rregullores së paraparë dhe në kohë ndaj të gjitha kërkesave dhe paraqitjet nga ana e klientëve tanë.", njoftojnë nga Kompania "Energy Ecolink".

 

 

Ndërkohë, qytetarët e anketuar nga TVM2, theksojnë se shumë vite më parë janë zhgënjyer nga shërbimet e Ngrohtores Veri, andaj kanë vendosur të largohen nga ky rrjet i ngrohjes. Ofrimi i shërbimeve cilësore dhe çmimet më të volitshme për disa do të ishin të pranueshme.

 

“Ka dhjetë vjet gati që nuk jemi të kyçur fare. Njëra arsye është sepse ishte shumë e shtrenjtë dhe e dyta nuk ishim shumë të kënaqur prej ngrohtores, kështu që u detyruam të shkyçemi  e tërë ndërtesa. Të gjithë jemi të shkyçur. Kur ishte më ftohtë nuk i lëshonin si duhet, prandaj u detyruam të largohemi.”, - tha një qytetar.

 

“Nuk jam, sepse ishin çmimet e larta. Kurse tani, nëse bëhet një çmim i volitshëm besoj se të gjithë banorët e kësaj hyrjeje mund të kyçemi, nëse çmimi është i volitshëm. Gjatë ftohjes kur temperaturat kanë qenë të ulëta, kemi pasur raste, kemi pasur ndërprerje nga 1-2 orë.”, - tha një qytetar tjetër.

 

“Unë jetoj në banesë private, kemi ngrohjen private, kështu që nuk jemi të kyçur. Do të kisha dashur të jem e kyçur, shumë është normale, sepse qytetarët dhe të gjithë banorët e Çairit kanë nevojë të jenë me një çmim normal të pranueshëm. Çmimet e tanishme janë të larta për standardin tonë.”, - u shpreh një qytetar.

 

“Kemi paguar atëherë për ta hequr ngrohjen. Unë isha si kryetar i kësaj banese dhe e kam hequr ngrohjen. Tash kanë vendosur të kyçen prapë, unë nuk jam dakord. Unë s'kam pasur ngrohje se jam në katin e 12-të, kam paguar 5.000 euro përmbaruesin. Tash nuk ka shanse që ta pranojmë atë ngrohje. Verës për çfarë të paguajmë ngrohje, kur ne gjatë verës paguajmë rrymë për ta freskuar.”, - u shpreh një qytetar tjetër.

 

Nga Ngrohtorja "Energy Ecolink" theksojnë se janë bërë të gjitha kontrollet e nevojshme në ndërtesa, si dhe në të gjitha institucionet shëndetësore, shkolla dhe kopshte dhe tashmë janë të gatshëm për fillimin e sezonit të ngrohjes. Për momentin prej 2.000 konsumatorëve të mundshëm, në rrjet janë të kyçur 484 në 28 objekte banesore.