Marrëveshja për emigrantët Itali – Shqipëri, në Shëngjin vijnë 16 klandestinët e parë

 

Pas procedurave brenda anijes, emigrantët e shoqëruar nga forcat e sigurisë italiane u vendosen në qendrën pritëse brenda portit të Shëngjinit. Ata do t’u nënshtrohen kontrolleve fizike e shëndetësore e më pas do të dërgohen në kampin e Gjadrit rreth 30 kilometra nga Shëngjini.

 

Operacioni i parë i këtij lloji në Shqipëri u zhvillua nën masa të forta sigurie krahas karabinierëve italianë, perimetrin e sigurisë e ruajnë dhe policët shqiptarë.

 

Një grup i vogël aktivistësh të shoqërisë civile zhvilluan protestë simbolike para ambienteve të Portit të Shëngjinit për të shprehur pakënaqësinë e tyre ndaj marrëveshjes Rama-Meloni.

Zona brenda kampit të Gjadrit do të monitorohet nga policia italiane, e cila qëndron ndërmjet ambienteve të punonjësve dhe refugjatëve. Kapaciteti aktual nuk i kalon 400 vende, por kampi do të zgjerohet në muajt në vijim, pasi deri më tani janë kryer vetëm 70% e punimeve.

 

Marrëveshja me Italinë për emigrantët u firmos më 6 nëntor 2023 në Romë mes kryeministrit Edi Rama dhe kryeministres italiane, Giorgia Meloni, dhe ngjalli shumë debate në të dy anët e Adriatikut, por pavarësisht kundërshtimeve u ratifikua me shumicë votash nga parlamentet e dy vendeve.