Tetova pret më shumë para nga ekzekutivi, Tearca ndjehet e zhgënjyer nga ndarja e kulaçit

 

 

“Komuna e Tetovës ka aplikuar për projekte me vlerë diku 230 milionë denarë apo 3.8 milionë euro. Dy projekte dje veç kanë kaluar në mbledhjen e djeshme të Qeverisë, që kanë të bëjnë me ujësjellësin përmes Ministrisë së Ekologjisë. Projekti i tretë dhe më kryesori apo kapitali ka ngelur që të sillet në mbledhjen e radhës në Qeveri, nga shkaku që mjetet janë dashur të planifikohen në Ministrinë e Arsimit. Nuk bëhet fjalë as për një shkurtim të mjeteve për financim të projekteve kapitale për komunën e Tetovës, por bëhet fjalë për procedura administrative të cilat në periudhën që vjen do të zgjidhen, dhe sigurisht ato mjete do të jenë në llogaritë e destinuara në komunën e Tetovës.”, - deklaroi kryetari i komunës së Tetovës, Bilall Kasami. 

 

Ndërsa nga ndihmat e Qeverisë për komunat, u la jashtë komuna e Tearcës, që sipas kreut të Qeverisë, Mickoski, komuna e Tearcës nuk i ka dorëzuar në kohë projektet. Sot ka reaguar i pari i Tearcës, Nuhi Neziri, i cili tha se deklarata e djeshme ishte  vetëm për të bërë lajme, pasi që ai projektet i ka dorëzuar edhe me postë. Por, thotë se do të aplikojë përsëri në afatin e dytë.

 

“Ju them me shumë bindje se kjo ishte një akrobacion për të bërë lajme se ne nuk kemi bërë aplikimin vetëm në formë elektronike, por e kemi dorëzuar edhe me postë, por dëgjuam me kujdes pjesën e dytë të deklaratës ku tha kryeministri se do të ketë një afat të dytë, andaj besoj se e gjithë kjo zhurmë ishte e panevojshme në vend, që në të kthehemi në peshën dhe vlefshmërinë e projekteve që kanë.”, - theksoi kryetari i komunës së Tearcës, Nuhi Neziri.

 

Qeveria i la jashtë ndihmave financiare komunën e Shkupit, Sarajit dhe Tearcës dhe Strumicës. Ndërsa më shumë projekte të financuar nga Qeveria fitoi komuna e Kumanovës.