5 masakra në Beit Lahia të Gazës, 102 të vrarë dhe 287 të plagosur

Lufta në Gazë vazhdon me intensitet të lartë. Në “5 masakrat" e fundit që ushtria izraelite ka kryer ndaj zonave të ndryshme të Gazës, janë vrarë 102 palestinezë, ndërsa 287 të tjerë janë plagosur.

Zona më e rrezikuar është Beit Lahia, në veri të Rripit të Gazës, e cila është nën rrethim dhe sulmohet vazhdimisht. Komuna e shpalli qytetin "zonë fatkeqësie", ku kriza humanitare po thellohet dita-ditës për shkak të okupimit, bllokadës dhe sulmeve intensive të Izraelit.

Në sulmin e parë u vranë 93 civilë, ndërsa në sulmin e fundit 13, të gjithë fëmijë.

“Do të vazhdojmë përpjekjet që të sjellim furnizime mjekësore, karburant, gjak, ushqim për stafin dhe pacientët. Ky është misioni i katër i OBSh-së, përgjatë këtyre dy javëve. Është shumë e rëndësishme në këto momente të transferojmë pacientët e plagosur.”, - deklaroi përfaqësuesi i OBSh-së, dr. Riçard Peperkorn.

“Situata edhe më tej është katastrofale edhe përskaj ndihmës së OBSh-së. Nuk ka ujë, nuk ka ushqim, nuk ka ilaçe. Edhe pse janë sjellë furnizime, ato janë shumë të pakta. Urgjentisht na duhen ekipe kirurgjike për intervenime për të shpëtuar jetën e pacientëve të plagosur.”, - theksoi drejtori i Spitalit në Gazë, Hosam Abu Safija.

Hamasi e pranon kërkesën e ShBA-së, Katarit dhe Egjiptit, vendet që   ndërmjetësojnë mes palëve të përfshira në konflikt për të arritur armëpushim, por fajëson Izraelin se përpiqet të shkaktojë pengesa në arritjen e paqes.

“Delegacioni i lëvizjes është i hapur për çfarëdo marrëveshje ose idesh që do t’i japin fund vuajtjes së popullit tonë në Gazë dhe jemi gati për t’i dhënë fund luftës njëherë e përgjithmonë.”, - theksoi përfaqësuesi i lartë i Hamasit, Sami Abu Zuhri.

Izraeli, i cili ka hapur fronte tjera në Lindjen e Mesme, kërcënon Iranin, se ka aftësi të madhe për ta shkatërruar nëse ndërhyn dhe rreshtohet në krahë të Hamasit.

"Nëse Irani bën gabimin e radhës duke lëshuar raketa në Izrael, ne përsëri do t’u tregojmë se mundemi të futemi në Iran dhe të shpalosim aftësitë tona që askush nuk i kanë parë deri tani.”, - u shpreh drejtuesi i Forcave të Mbrojtjes të Izraelit, Herzi Halevi.

Numri i palestinezëve të vrarë nga ushtria izraelite në Rripin e Gazës është rritur në  43.163, që nga fillimi i këtij konflikti. (Farije Dauti Bakiju, TVM2)