Prokuroria themelore – Shkup hapi lëndë për drejtorin e ASK-së, Hristovski

Prokuroria Themelore Publike në Shkup hapi lëndë pas një kallëzimi penal anonim kundër drejtorit të Agjencisë për Siguri Kombëtare, Bojan Hristovski.

“Në Prokurorinë Themelore Publike - Shkup është dorëzuar kallëzim penal anonim, i cili i është caktuar prokurorit publik dhe është duke u vepruar.”, thonë nga Prokuroria.

Kallëzimi ka të bëjë me certifikatën TOEFL nga shkolla bullgare “Julia”, certifikatat e së cilës janë deklaruar të falsifikuara. Pasi LSDM-ja opozitare kishte kërkuar hetim të rastit nga ana e Prokurorisë, nga kjo e fundit patën deklaruar se do të presin vendimin e Komisionit kundër Korrupsionit.

Ndërkohë Komisioni Shtetëror për Parandalim të Korrupsionit, javën e kaluar hapi lëndë për emërimin e Bojan Hristovskit për drejtor të ASK-së, pasi tek Antikorrupsioni ka arritur ankesë anonime në të cilën ka shkruar se ai gjoja nuk i përmbushë kushtet për të qenë drejtor.