Zgjedhjet në ShBA, Kamala Harris: Duhet të pranojmë rezultatin e këtyre zgjedhjeve

Kamala Harris ka reaguar për herë të parë pas humbjes së zgjedhjeve presidenciale kundrejt Donald Trampit. Kandidatja demokrate, gjatë një fjalimi deklaroi se duhet të pranohet rezultati i zgjedhjeve.

“Në kombin tonë ne i detyrohemi besnikërisë jo një presidenti apo partie, por Kushtetutës së Shteteve të Bashkuara dhe besnikërisë ndaj ndërgjegjes dhe Zotit tonë. Besnikëria ime ndaj të treve është arsyeja pse them, ndërsa i pranoj këto zgjedhje, nuk e pranoj luftën që nxiti këtë fushatë.”, tha Harrisi. Zëvendëspresidentja Kamala Harris ka telefonuar Donald Trampin për ta uruar për fitoren e zgjedhjeve presidenciale të vitit 2024.

Harrisi nuk arriti të bëhej presidentja e parë femër e ShBA-së. Ajo është, në fakt, e dyta pas Hillari Klintonit, që nuk arriti të mundë kandidatin republikan, Donald Tramp.

Harrisi përfundimisht nuk arriti të bindë shumicën e rreth 244 milionë votuesve amerikanë me narrativën që ndërtoi: një ish-prokurore që kandidoi kundër një të dënuari, një avokate e të drejtave riprodhuese të grave kundër burrit që ndihmoi në përmbysjen e vendimit historik Roe v. Uade, një demokrate e gjeneratës së ardhshme që konkurroi kundër një republikani 78-vjeçar.