Komisioni kuvendor për përfaqësim të drejtë, kërkohet plan veprim nga Qeveria brenda 1 muaji

 

“Komisioni t’i dorëzojë Qeverisë së RMV-së kërkesë për dorëzim të planit aksionar për përfaqësim adekuat dhe të drejtë të qytetarëve përkatës, të gjitha bashkësive në organet e pushtetit shtetëror dhe normal bashkërisht vendosim afatin deri kur të dorëzohet ky plan, mendoj që gjysma e dhjetorit është kohë e mjaftueshme nga sot deri në gjysmën e dhjetorit. Afati 30 ditorë për Qeverinë, mendoj se është afat i mjaftueshëm që të mund të përgatisin të gjitha të dhënat.”, - deklaroi Talat Xhaferi nga BDI.

 

Halil Snopçe nga VLEN-i thekson se kjo nuk ka të bëjë me “balancuesin”, por që bëhet fjalë për Komision, i cili do të mbikëqyr implementimin e përfaqësimit të drejtë.

 

“Ky është vetëm Komision për mbikëqyrjen dhe implementimin e përfaqësimit të drejtë dhe barabartë nëpër instancat e administratës publike. Në rrjedhë e sipër është puna e grupit punues për përgatitjen e Ligjit për përfaqësim të drejtë dhe adekuat për shkak se kjo është kategori kushtetuese dhe për t’u zbatuar patjetër duhet të realizohet me një ligj përkatës.”, - theksoi Halil Snopçe nga VLEN-i.

 

Komisioni mund të japë rekomandime, mendime dhe konkluzione, të cilat duhet të zbatohen nga organet e Qeverisë dhe institucionet e tjera publike në të gjitha nivelet, lidhur me situatën për përfaqësim përkatës dhe të drejtë të qytetarëve që i përkasin të gjitha bashkësive. Komisioni përbëhet prej 12 deputetëve. Ndryshe, Komisioni për përfaqësim të drejtë dhe adekuat të bashkësive është themeluar për herë të parë në Kuvend këtë mandat.