Ngërç në Komisionin për Mbikëqyrjen e ASK-së, nuk hapet diskutim për emërimin e Hristovskit

 

“Në momentin që as unë dhe as zëvendësi im nuk kemi certifikatë sigurie, këto pika unë nuk mund t’i fus në rend dite, pasi që unë duhet të jem ai i cili duhet të jetë pjesë e vizitave. Thjesht duhet të kërkojmë mënyrë se si të respektohet procesi i marrjes së certifikatës së sigurisë.”, - deklaroi kryetari i Komisionit për Mbikëqyrjen e ASK-së, Skender Rexhepi.

 

“Kryetar, unë nuk e di se në cilën pjesë nuk kuptohemi. Certifikatën ju ndoshta nuk do ta fitoni deri në fund të mandatit.”, - theksoi koordinatori i VMRO – DPMNE-së, Nikolla Micevski. 

 

“Atëherë ndoshta deri në fund të mandatit nuk do të ketë gjë të tillë.”, - u shpreh kryetari i Komisionit për Mbikëqyrjen e ASK-së, Skender Rexhepi. 

 

Sipas socialdemokratëve, ardhja më kot e Hristovskit në Kuvend, konfirmon dyshimet për emërimin e jashtëligjshëm të tij. Ata akuzojnë pushtetin se ik nga përballja me opinionin e gjerë. Do të iniciojnë ndryshimin e rregullores, ndërkaq s’do të heqin dorë nga skanimi i emërimit të Hristovskit.

 

“Duke ditur rëndësinë e punës së shërbimeve, por duke e ditur gjithashtu edhe qëllimin e këtij pushteti, dhe këtë e pamë sot që t’i vendosë në funksion partiak këto shërbime, unë personalisht besoj se ky do të jetë edhe qëndrimi i grupit tonë parlamentar, do të mbështesim çdo mënyrë të zgjidhjes konstruktive që ky komision të nisë punën.”, - theksoi deputetja e LSDM-së, Sllavjanka Petrovska.

 

Që komisioni të nisë punën, nga VMRO-DPMNE-ja i propozuan opozitës të iniciojë ndërrimin e Rexhepit, pasi justifikojnë kërkesën e tyre.

 

“Nëse kanë mospajtim me kryetarin, nëse kanë revoltë sa i takon punës së komisionit, lirisht mund të dorëzojnë interpelancë ndaj kryetarit të komisionit, ne do ta mbështesim.”, - u shpreh deputeti i VMRO – DPMNE-së, Toni Jarevski.

 

Emërimi i Bojan Hristovskit kontestohet nga socialdemokratët në pjesën e mungesës së arsimit adekuat, mosnënshtrim të vetingut gjatë reformave të shërbimeve, si dhe posedimit të certifikatës së rreme për njohjen e gjuhës angleze.