Sektori ekonomik, apel për bashkëpunim rajonal

   

“Paralajmërimet e fundit të BE-së se është e gatshme të ndajë 1 miliard euro për Korridorin 8 dhe 10 nuk duhet t’i lënë indiferentë qeveritarët në Shkup dhe Sofje, të cilët do të jenë fajtorë nëse nuk ndërtohet hekurudha dhe magjistralja drejt dy kryeqendrave”- deklaroi kryetari i Odës Ekonomike Maqedono-bullgare, Zore Temellkovski.        

 

Angazhimi i Qeverisë dhe Ministrisë së Ekonomisë në Maqedoni për ndërtimin e këtyre korridoreve nuk do të mungojë, premtoi me këtë rast ministri i Ekonomisë, Bekim Neziri. Ai tha se qeveria është e kyçur aktivisht në projekte konkrete, që do të mbështeten nga fondet evropiane.  

                                                                                                                  

“Në fund të vitit të kaluar, në konferencën e cila u mbajt nën patronatin e kancelares Merkel, saktë u përcoll porosia se Evropa është interesuar të përkrah projekte rajonale, andaj edhe ne si qeveri edhe Ministria e Ekonomisë punojmë në drejtim të dorëzimit të projekteve konkrete, të cilat do të  jenë hallkë  e realizimit të projekteve rajonale, që kanë të bëjnë me përmirësimin e lëvizjes ose për përmirësimin e këmbimit tregtar mes vendeve fqinje dhe më gjerë”- tha ministri i Ekonomisë, Bekim Neziri.      

                     

Edhe Aleanca Kosovare e Biznesit shprehu interesim për bashkëpunim rajonal, me ç’rast ftoi afaristët nga Maqedonia dhe Bullgaria për bashkëpunim me sektorin ekonomik në Kosovë.                                                  

“Aleanca Kosovare e Bizneseve është e hapur edhe për të gjitha aleancat apo odat e tjera ekonomike nga Republika e Maqedonisë dhe nga Republika e Bullgarisë, andaj edhe me këtë rast ju bëj ftesë të gjitha shoqatave, odave, të gjithë afaristëve nga Maqedonia, Hungaria që të ndërlidhen dhe të bashkëpunojnë me Aleancën Kosovare të Bizneseve, me qenë se bizneset nuk njohin kufi”- theksoi Suad Berisha nga Aleanca Kosovare e Biznesit.

 

Nevojën e bashkëpunimit ekonomik rajonal e theksoi edhe ambasadori bullgar në Maqedoni, Ivan Petkov, dhe kryetari i Odës Ekonomike të Maqedonisë Veri-perëndimore, Menderes Kuçi.