Propozim-buxheti përplas pushtetin me opozitën, Murat: Buxheti diskriminon fëmijët turq

 

“Neve po na bëhet një padrejtësi e madhe, vetëm pse jemi turq, por një ditë kur RMV-ja të jetë vend më demokratik do ta kuptoni këtë padrejtësi që po e bëni, por mos harroni se ju keni marrë vota edhe nga turqit. Ne si turq jemi në RMV diku 65.000, por nuk po kemi të drejtë as të shkollohemi, e ku më të kemi ministra në kabinetin e Qeverisë.”, - deklaroi deputeti i “Frontit Evropian”, Sali Murat. 

 

 

Por, ka reaguar deputetja e VMRO-DPMNE-së, Dafina Stojanovska, e cila theksoi se këtë retorikë deputeti e ka zgjedhur me qëllim që të jetë në qendër të vëmendjes, dhe pse ka hallin e turqve. 

 

“Ju deputetë keni heshtur kur është folur për Ligjin e gjuhëve, ndërsa unë kam mbrojtur këtu përkatësinë edhe të shqiptarëve edhe të turqve. Por, jemi mbushur me këtë retorikë nga BDI-ja, por BDI-ja nuk është reprezenti i vetëm i shqiptarëve. Nuk është me rëndësi a është një deputet apo ministër turk apo shqiptar apo ndonjë etnie tjetër, me rëndësi është të punojnë në të mirën e të gjithëve.”, - theksoi deputetja e VMRO-DPMNE-së, Dafina Stojanovska. 

 

Sipas pushtetit, në këtë buxhet janë rritur të ardhurat e buxhetit në të gjitha ministritë dhe theks i është kushtuar Ministrisë së Mbrojtjes, Ministrisë së Punëve të Brendshme dhe Ministrisë së Shëndetësisë. Debati për Buxhetin e vitit të ardhshëm i Komisionit Parlamentar të Financimit dhe Buxhetit zgjat 10 ditë dhe duhet të përfundojë jo më vonë se data 30 nëntor, e më pas vazhdon në seancë plenare. Për propozim-buxhetin për vitin 2025 janë dorëzuar gjithsej 308 amendamente, prej të cilave 204 nga LSDM-ja opozitare. Sipas ligjit, buxheti për vitin 2025 duhet të votohet deri më 31 dhjetor.