Bajden: Urdhërarresti i GjNP-së për Netanjahun, fyes

“Çfarëdo që mund të nënkuptojë GjNP-ja, nuk ka asnjë ekuivalencë, asnjë midis Izraelit dhe Hamasit. Ne do të qëndrojmë gjithmonë me Izraelin kundër kërcënimeve ndaj sigurisë së tij.”, ka thënë Bajdeni.

 

 

Kryeministri hungarez, Viktor Orban, ka thënë se do ta ftojë kryeministrin e Izraelit, Benjamin Netanjahu, për vizitë në Hungari, duke shtuar se do të garantojë se fletarrestimi i lëshuar nga Gjykata Ndërkombëtare Penale kundër Netanjahut “nuk do të zbatohet”. Orbani, vendi i të cilit mban kryesimin e presidencës me rotacion 6-mujor të Bashkimit Evropian, tha për radion shtetërore se fletarrestimi i GjNP-së për Netanjahun është “gabim” dhe shtoi se lideri izraelit do të jetë në gjendje të mbajë bisedime në Hungari “me siguri adekuate”.

 

GjNP-ja lëshoi fletarrestime të enjten për Netanjahun, ish-ministrin e tij të Mbrojtjes, si dhe për liderin e Hamasit, Ibrahim Al-Masri, të cilët i akuzon për krime lufte dhe krime kundër njerëzimit në konfliktin në Gazë. Si Izraeli, ashtu edhe Hamasi i hedhin poshtë akuzat e GjNP-së.