Transporti publik në Shkup, Qytetarët: Gjendja u normalizua pas intervenimit të Qeverisë

 

“Sot ka rregullisht autobusë dhe nuk kam pritur shumë diku rreth 10 minuta.”, - tha një qytetar.

 

“Autobusë për Shuto Orizarë nuk ka. Dhe unë këtu pres një orë.”, - tha një qytetar tjetër.

 

“Ka autobusë, por nuk ka shumë. Ne presim rreth 20 minuta këtu.”, - u shpreh një qytetar.

 

“Unë 40 minuta e prita 9-shin, ndërsa tani sa erdha këtu. Nuk e di sa do të pres.”, - u shpreh një qytetar tjetër.

 

“Sa zbrita prej autobusit, sot ka autobusë, mirë është gjendja, nuk mund të ankohem, mirëpo dje kemi pritur dhe jemi lodhur jashtëzakonisht shumë.”, - tha një qytetare.

 

“Unë vij nga lagjja Lisiçe e Re dhe sot menjëherë erdh autobusi.”, - tha një qytetare tjetër.

 

“Për mrekulli, në mëngjes menjëherë sa arrita në stacion të autobusit, erdhi autobusi, nuk prita fare, e as nuk kishte rrëmujë në autobus.”, - u shpreh një qytetare.

 

 

Drejtori i NQP-së, Dragi Kushovski, për TVM2 tha se gjatë mbrëmjes së kaluar dhe mëngjesin e sotëm kanë pranuar sasitë e para të naftës dhe se furnizimi me naftë po zhvillohet në mënyrë graduale. Përshëndet vendimin e Qeverisë për huazimin e naftës nga rezervat shtetërore dhe shpreson se do të vazhdojnë bisedimet në koordinim me BNJVL-në dhe Qytetin e Shkupit për të normalizuar gjendjen me transportin publik në Shkup.

 

“Transporti publik sot është duke u normalizuar. Të gjitha linjat funksionojnë, njësoj si para se të shfaqej problemi me mungesën e derivateve të naftës. Të gjithë autobusët që janë në gjendje të mirë po qarkullojnë në kryeqytet.”, - theksoi drejtori i NQP-së për TVM2, Dragi Kushovski.

 

Vendimi i Qeverisë për të furnizuar Ndërmarrjen e Transportit Publik me naftë është zgjidhje vetëm për shtatë ditët e ardhshme. Në këtë periudhë duhet të nënshkruhet kontrata e re, në mënyrë që NPQ “Shkup” të funksionojë në kushte normale dhe pa pengesa.