Ibraimi dhe Arifi: Për arsye politike, Limani pengon hapjen çerdheve

 

“Fatmir Limani ka vendosur pa asnjë shpjegim apo arsyetim t’i bllokojë pëlqimet në sirtarët e tij, duke mos i lëshuar në procesim dhe njëherit bllokon  punësimet të cilat janë të domosdoshme për funksionimin e çerdheve. Për ta konstatuar se ministri jolegjitim, Fatmir Limani, ka vepruar në bazë të inateve dhe frustrimeve politike, në të njëjtën procedurë, identike, kanë qenë edhe çerdhet në komunat e Çairit dhe Tetovës, për të cilat më janë lëshuar pëlqimet. Nuk ka asnjë dallim në situatën faktike, ASNJË! Ministri jolegjitim, Fatmir Limani, mban përgjegjësinë e plotë, që sot mbi 230 fëmijë presin për t’u sistemuar në çerdhe për fajin e tij.”, - deklaroi kryetari i komunës së Haraçinës, Ridvan Ibraimi.

 

 

Për kryeministrin Mickoski, çështja me çerdhet, duke përfshirë edhe atë në komunën e Haraçinës dhe Likovës, janë probleme të trashëguara, por të njëjtat janë tejkaluara. Ai sqaron se problem ka qenë dhënia e provimit, pasi qindra përkëdhelës dhe edukatore nuk kanë mundur të pajisen me licenca për t’u punësuar. 

 

“Ministria e Financave ka aprovuar punësimet për komunën e Haraçinës dhe në komunën e Likovës, por më e rëndësishmja është se është tejkaluar problemi i dhënies së provimit. Ishte problem që qindra edukatorë nuk mundën të merrnin një licencë të përshtatshme për t'u punësuar. Me një vendim të Qeverisë zgjatëm mënyrën e vjetër të dhënies së provimeve deri në fund të vitit 2025. Me këtë, ky problem u tejkalua.”, - theksoi kryeministri, Hristijan Mickoski.

 

Gati është edhe çerdhja “Bambi” në Çair, por ende nuk ka nisur me punë. Situatë të ngjashme ka edhe në çerdhen “Rilindja” të Tetovës, ku u paralajmëruan rreth 30 punësime, të cilat nuk janë realizuar akoma. Ndërsa pritet që së shpejti në funksion të futen edhe çerdhet në Prilep dhe Koçan.