Kurti: Kosova do të ketë industrinë e saj ushtarake

 

“Do të themelojmë Komisionin ndërministror për qëllim të vlerësimit dhe nisjes së procedurave e negociatave lidhur me hapjen e fabrikës për prodhimin e municionit dhe për laborator mbi dizajnimin e fluturakeve pa pilot në Republikën e Kosovës. Një ushtri që për një kohë kaq të shkurtër është armatosur kaq shumë sa kjo e jona, ka nevojë për ta siguruar e garantuar operacionalitetin e plotë dhe qëndrueshmërinë tërësore, prandaj ne sot hedhim hapat tona të parë për ngritjen e industrisë ushtarake.”, - theksoi kryeministri i Kosovës, Albin Kurti. 

 

 

Ministri i Mbrojtjes, Ejup Maqedonci, bëri të ditur se për këtë projekt janë koordinuar me partnerët ndërkombëtarë, përfshirë ShBA-në, ndërsa Ministria e Mbrojtjes e Turqisë tanimë ka përpiluar një “raport fizibiliteti” për prodhimin e municionit.

 

“Për hapjen e fabrikës shtetërore të municionit jemi në kontakt dhe kemi pranuar edhe një raport fizibiliteti me prodhues shtetëror nga Ministria e Mbrojtjes e Republikës së Turqisë.”, - deklaroi ministri i Mbrojtjes i Kosovës, Ejup Maqedonci.

 

Kosova synon edhe prodhimin e fluturakeve pa pilot, përkatësisht dronëve, të cilët, siç tha ministri Maqedonci, paraqesin një sistem të ri që po aplikohet në luftërat në Ukrainë dhe Lindjen e Mesme.

 

“Është një sistem i nevojshëm dhe i domosdoshëm dhe përmes këtij laboratori vendi ynë do të ketë mundësi që të punojë në dizajnimin e fluturakeve, të cilat në të ardhmen mendohet se mund të prodhohen pikërisht në vendin tonë. Edhe për këtë kemi diskutime me shumë partnerë.”, - u shpreh ministri i Mbrojtjes i Kosovës, Ejup Maqedonci.

 

Municionet e prodhuara në Kosovë do të jenë me standarde të NATO-s, tha ministri Maqedonci, sipas të cilit me këtë synohet rritja e sigurisë për Kosovën, por edhe mbështetje e partnerëve në aspekt të municionit dhe sistemeve të armatimit.