Akuzat rreth largimit të shqiptarëve nga puna, Sulejmani: Janë ngritur procedura hetimore

 

“Nuk janë të vërteta akuzat se po përjashtohen shqiptarët nga puna, kanë qenë të punësuar në mënyrë të paligjshme dhe prandaj u janë ndërprerë kontratat. Zgjidhje do të mundohemi të gjejmë vitin e ardhshëm. Ka procedurë hetimore për këto raste dhe prandaj ne nuk kemi mundur që në publik të hedhim dokumente, sepse do ta pengonin hetimin e këtyre rasteve. Edhe për rastin në Kumanovë është ngritur procedurë.”, - deklaroi zëdhënësi i VLEN-it, Driton Sulejmani.

 

Sa i përket paralajmërimit të Blerim Bexhetit se do ta padisë koalicionin VLEN për shpifje, nëse nuk kërkojnë falje publike për akuzat se eksponentë të lartë të BDI-së kanë pasur plan për rikthimin e ish-kryeministrit, Nikolla Gruevski, nga Hungaria, Sulejmani tha se është vetëm tentativë për t’u ikur përgjigjeve reale. 

 

“Edhe ndryshimet në kodin penal, të cilët i sjelli Qeveria e kaluar LSDM-BDI, dyshojmë se arsyeja kryesore ka qenë që të amnistohen lëndët në të cilat ka qenë i akuzuar Nikolla Gruevski. Mendoj se janë argumente të mjaftueshme për të konkluduar se ka pasur tentativë për kryerjen e një operacioni të tillë. Pse është vepruar në këtë drejtim? Mendojmë se qëllimi i vetëm ka qenë vazhdimi i pushtetit të BDI-së.”, - theksoi zëdhënësi i VLEN-it, Driton Sulejmani. 

 

Nga VLEN-i kujtojnë edhe deklaratën e ish-presidentit, Pendarovski, se disa eksponentë politikë e kanë konsultuar për amnistimin e mundshëm të Gruevskit dhe kërkojnë nga i njëjti që të tregojë se kush janë ato persona. Por, deputeti i BDI-së, Blerim Bexheti, në një njoftim drejtuar mediave ka thënë se asnjëherë nuk ka marrë ndonjë audio apo video-incizim nga sinjalizues apo punonjës në zyrën e Presidentit apo as që nuk ka marrë ndonjë informacion për ndonjë takim me politikanë, në të cilin është diskutuar për kthimin e Nikolla Gruevskit. Madje Bexheti ka paralajmëruar padi edhe për mediat, që siç thotë ai, kanë shpifur për një lajm të tillë.