Incidentet me flamujt, Rexhepi: Të nxitura nga policia e papërgjegjshme

 

“Ne do të dëshmojmë gjithashtu se policia e shtetit jo vetëm që ka pamundësuar kremtimin e qetë të festës kombëtare shqiptare por përkundrazi ka nxitur tensionet, urrejtjet dhe përçarjet duke mos lejuar festimin ashtu siç ka ndodhur gjithmonë dhe duke përdhosur flamurin kombëtar shqiptar nga ana e pjesëtarëve të uniformuar të saj.”, tha Bajram Rexhepi, nënkryetar i BDI-së.

 

 

Nga BDI akuzojnë pushtetin për standarde të dyfishta duke ndëshkuar vetëm qytetarë shqiptarë, ndërkaq lidhur me djegien e flamurit shqiptar në Prilep, ditë më pare, nuk ka asnjë reagim. Por zëvendës kryeministri i parë thotë se trajtimi para ligjit do të jetë i barabartë për secilin, i cili ka përdhosur flamurin kombëtarë apo shtetëror. Të rinjtë shqiptarë sipas Mexhitit janë manipuluar nga struktura të BDI-së. Mexhiti fton qytetarët për qetësi.

 

“Ashtu siç është vepruar ndaj atyre që e kanë shkel flamurin shtetëror, njëjtë pra në Prilep veprohet edhe me ata që e kanë shkel flamurin kombëtar shqiptar dhe po ashtu këtu kemi kërkuar që të ngrihet masë disiplinore dhe të mirren masa për përgjegjësi edhe për policin në Kumanovë, i cili në vend se të mban rendin është futur në diçka, e cila nuk është në kompetencat e tij. Rastësisht apo jo del që disa të rinjtë janë të manipuluar pikërisht nga ato, mirëpo këtë do ta sqarojmë ditëve në vijim me fakte dhe argumente.”, u shpreh zëvendëskryeministri i parë Izet Mexhiti.

 

Për gjithë situatën e krijuar BDI kërkon dorëheqjen e menjëhershme të ministrit dhe zëvendës ministrit të brendshëm, përndryshe javën tjetër do të ngrenë interpelancë ndaj tyre në Kuvend. Apel për të vëzhguar situatën drejtojnë edhe kah faktori ndërkombëtarë.