Intonimi i himnit në shkolla, Janevska: BDI-ja të mbështesë propozim-ligjin

 

“Është një kompliment për ministrinë që nuk u gjet asnjë e metë tjetër, por mendoj se është jashtëzakonisht e paarsyeshme të ndalohet ligji për arsimin e mesëm, i cili ka më shumë se 20 vjet që nuk ka ndryshuar, për të mos mundur  të zbatohen risitë që shteti i pret të paktën shtatë vjet, e me sa duket më shumë, për shkak të një diskutimi të tillë. Ligji sot është në rend dite të seancës parlamentare. Shpresoj se deputetët e BDI-së do të gjejnë forcë për ta tejkaluar situatën politike apo vlerën politike që de facto nuk është vlerë dhe do të mbledhin forcat për ta miratuar ligjin pas leximit të dytë.”, - deklaroi ministrja e Arsimit, Vesna Janevska. 

 

 

Por, Elmi Aziri nga Fronti Evropian kërkoi që propozim-ligji për arsimin e mesëm të hiqet nga rendi i ditës, për shkak të ndjeshmërisë së ligjit, i cili prek të gjitha komunitetet etnike, por propozimi i tij nuk u pranua. Edhe deputetja Pasholli nga radhët e BDI-së tha se nuk ka asnjë shtet që imponon himnin shtetëror në shkollat e mesme, kur himni nuk reflekton identitetin e të gjitha bashkësive etnike. 

 

“Si Front Evropian dënojmë ashpër tendencat për minimizimin e barazisë multietnike si garanci për stabilitet dhe të ardhmen e RMV-së. Dënojmë ashpër çdo përpjekje të kësaj Qeverie monoetnike për të imponuar frymë kundër Marrëveshjes së Ohrit, përmes propozim-ligjeve që imponojnë dominancën etnike në kurriz të bashkësive të tjera etnike.”, - theksoi Arbana Pasholli nga BDI.

 

 

Nga LSDM-ja akuzojnë se pa debat publik, Qeveria po bën ndryshime ligjore që e kthejnë prapa procesin arsimor. 

 

“Komisioni për Arsim, Shkencë dhe Sport, si dhe ministrja Janevska, nuk e kanë treguar kapacitetin e tyre demokratik dhe nuk e kanë pranuar propozimin tonë për debat publik për të gjitha ligjet që janë vënë në rend dite. Me këtë ata përjashtuan opinionin dhe komunitetin e ekspertëve nga shprehja e mendimeve dhe argumenteve të tyre.”, - u shpreh Daniela Nikollova nga LSDM.

 

 

Edhe Komisioni për Parandalimin dhe Mbrojtjen e Diskriminimit i bëri thirrje Kuvendit të organizojë debate publike për ligjet në fushën e arsimit.

 

 

Ligji i ri për Arsimin e Mesëm parasheh që në fillim dhe në fund të vitit shkollor, në përfundim të arsimit të mesëm, në festën e patronateve, si dhe në festa të tjera, të këndohet himni kombëtar. BDI-ja e konsideron se fëmijët do ta refuzojnë këtë, sepse himni nuk pasqyron identitetin e shqiptarëve.