Inspektim i jashtëzakonshëm në Klinikën e Fëmijëve, të enjten priten informata për foshnjën e vdekur

 

“Gjatë ditës së sotme është lëshuar urdhër për një inspektim të vetëm të jashtëzakonshëm në Klinikën për Sëmundje të Fëmijëve me të dhëna për foshnjën e vdekur shtatëmuajshe, e cila sipas deklaratave të drejtorit aktual është sjellë me dëmtime të rënda në disa organe. Pas konstatimit të gjendjes faktike, sa i përket pritjes, ofrimit të kujdesit shëndetësor, si dhe regjistrimit, do të dalim me të dhëna më konkrete gjatë ditës së nesërme.”, - deklaroi drejtori i Inspektoratit, Kiril Llazov. 

 

Kanë reaguar nga Bashkimi Demokratik për Integrim, sipas të cilëve fakti se 5 fëmijë kanë vdekur në më pak se dy muaj, tregon se koha është që dikush të mbajë përgjegjësi.

 

“Vdekja e një tjetër fëmije të pafajshëm në Klinikën Universitare për Fëmijë është një tragjedi që nuk mund të kalojë pa përgjegjësi. Kjo është hera e pestë që dëgjojmë për humbjen e një jete të re, brenda dy muajve, ndërsa sistemi shëndetësor është lënë në autopilot dhe ministri i Shëndetësisë merret me agjenda të partisë. Në emër të përgjegjësisë ndaj qytetarëve, kërkojmë menjëherë dorëheqjen e drejtorit të Klinikës dhe ministrit të Shëndetësisë. Mospërgjegjësia dhe paaftësia e paprecedentë po u  kushton jetë fëmijëve tanë më të dashur. Ky është një alarm që nuk mund të injorohet më.”, thonë nga BDI.

 

Sipas të dhënave të Entit Shtetëror të Statistikave, shkalla e vdekshmërisë së të porsalindurve dhe fëmijëve deri në 5 vjeç është rritur me 15% në vitin 2023 krahasuar me të njëjtën periudhë të një viti më parë.