Keqpërdorimet në Lotari, Mexhiti: Askush nuk është mbi ligjin

 

“Fjalën kryesore e kanë organet e rendit, në veçanti Gjyqësia dhe Prokuroria. Nuk do të ndërhyjmë, do të respektojmë rregullin derisa nuk dënohen, pra shpallen fajtorë. Ajo që nuk është paraqitur, sërish do t’ia lëmë organeve të rendit. Me rëndësi porosia është që askush nuk është mbi ligjin. Gjithkush që e ka shkelur ligjin duhet të përgjigjet para ligjit, ose nesër ose pasnesër. Mirëpo patjetër do të ketë ballafaqim.”, - deklaroi zëvendëskryeministri i parë, Izet Mexhiti.

 

 

Mexhiti thotë se skandali në lotari është veprimtari më e gjerë, pasi nën llupën e gjyqësorit janë edhe gjashtë ish-zyrtarë të tjerë. Nga VMRO-DPMNE-ja ftojnë Grubin të kthehet në Maqedoni dhe të japë përgjegjësi para organeve të drejtësisë.

 

“Se a është i pastër si loti apo i turbullt, le ta dëshmojë para gjykatës, nëse ka guxim të përballet me dëshmitë. Krimi në lotari është 8 milionësh ku aktorë kryesorë janë Artan Grubi dhe Përparim Bajrami si drejtor i Lotarisë.”, - theksoi Mile Lefkov nga VMRO-DPMNE.

 

 

Bashkimi Evropian, i përmbajtur ndaj aktiviteteve gjyqësore.

 

“Në këtë fazë nuk kam koment. Duhet të lejojmë Gjykatën dhe Prokurorinë të vazhdojnë hetimin dhe ta lëmë vetë drejtësinë të flasë për vete.”, - u shpreh euroambasadori, Mihalis Rokas. 

 

Edhe ambasadorja e ShBA-së, Angela Ageler, pa koment ndaj hetimit të Prokurorisë për ish-zëvendëskryeministrit, Artan Grubit, dhe gjykatësit, Enver Bexheti, pasi që të dy u përfshinë në listën e zezë amerikane për korrupsion. Nuk jam pjesë e asnjë prej proceseve të brendshme hetuese në këtë vend, është shprehur Ageler. Më 9 dhjetor Departamenti Amerikan i Shtetit përcaktoi Grubin dhe Bexhetin për përfshirje në korrupsion nëpërmjet ryshfetit të marrë për të minuar proceset gjyqësore ndaj Sasho Mijallkovit. Pas dy ditëve, Prokuroria hapi hetime.