Izraeli bombardon dy shtëpi në veri të Gazës, vriten 11 palestinezë

Të paktën 11 palestinezë janë vrarë dhe shumë të tjerë janë plagosur në sulmin e ushtrisë izraelite ndaj dy shtëpive në veri të Rripit të Gazës, raporton Anadolu.

Sipas informacionit që gazetari i AA-së ka siguruar nga burimet lokale, avionët luftarakë izraelitë bombarduan një shtëpi në rajonin Jabalia në veri të Rripit të Gazës. Sipas të dhënave, 8 persona humbën jetën dhe shumë të tjerë u plagosën si pasojë e sulmit ajror në shtëpinë e familjes palestineze Najjar.

Në sulmin ajror ndaj shtëpisë së familjes Al-Zaitune në qytetin verior të Gazës, humbën jetën 3 persona dhe u plagosën 10 të tjerë mes tyre edhe fëmijë.

Zëdhënësi i Administratës së Mbrojtjes Civile në Gaza, Mahmoud Basal deklaroi se ushtria izraelite kreu masakër duke sulmuar dy shtëpi në veri. Ai tha se shtëpitë u shkatërruan si rezultat i sulmeve dhe se për të bllokuarit nën rrënoja përfshirë fëmijë, kanë filluar përpjekjet e kërkim-shpëtimit.

Në sulmet e ushtrisë izraelite në Rripin e Gazës që nga 7 tetori 2023 janë vrarë 45.097 palestinezë, përfshirë 17.492 fëmijë dhe 11.979 gra ndërsa 107.244 persona të tjerë u plagosën.

Nën rrënoja ende ka mijëra të vdekur ndërsa po shkatërrohet infrastruktura civile duke synuar spitalet dhe institucionet arsimore ku njerëzit janë strehuar.