Dimri mbërrin në Rripin e Gazës, popullsia e zhvendosur mund të mos i mbijetojë

Dimri ka mbërritur në Rripin e Gazës. Pothuajse dy milionë njerëz janë prekur, të zhvendosur nga lufta shkatërruese 14-mujore. Ata që jetojnë në strehimore të improvizuara mund të mos i mbijetojnë dimrit, ka paralajmëruar OKB-ja. Urdhrat për evakuim vazhdojnë. Viktima dhe të plagosur pas një sulmi në një shkollë që strehonte familje të zhvendosura. Mbrojtja izraelite pretendon se ka kërkuar evakuimin dhe se objektivi i sulmit ishin luftëtarët e Hamasit.

 

“I ftohti jashtë është shumë i ashpër dhe i fortë. Kjo është arsyeja pse ne qëndrojmë brenda çadrës.”, u shpreh i zhvendosur nga qyteti i Gazës.

 

“Nuk kemi rroba të përshtatshme. Nuk e prisnim të bënim një jetë të tillë. Shtëpia ime jo në veri ishte aq e mirë.”, u shpreh i zhvendosuri nga Xhabalia.

 

Vazhdojnë negociatat për armëpushimin. Izraeli kërkon lirimin e pengjeve meshkuj në fazën e parë të marrëveshjes, ndërsa Hamasi kërkon dëmshpërblim. Në rrugët e Tel Avivit protesta të reja për lirimin e pengjeve që nga 7 tetori i vitit të kaluar.

 

“Ka bisedime të vazhdueshme dhe hapa të vazhdueshëm drejt një marrëveshjeje dhe ne po dëgjojmë lajme pozitive. Dhe më pas kryeministri bën një deklaratë për mediat e huaja duke thënë se spekulimet nuk janë të vërteta.”, u shpreh një protestues.

 

“Shikoni, sa herë që ka bisedime duhet të jem optimist. Megjithëse jam shumë, shumë i shqetësuar që kryeministri Netanyahu do të bëjë çmos për të ngrirë sërish marrëveshjen siç ka bërë për çdo shans për të negociuar në 14 muajt e fundit.”, tha një protestues.

 

Në Libanin jugor, i cili është prekur fuqishëm nga përshkallëzimi i fundit midis Izraelit dhe Hezbollahut, është theksuar nevoja për mbështetje nga agjencia palestineze e refugjatëve.

 

“Kaq shumë shkatërrim. Kolapsi ekonomik, shpërthimi i portit të Bejrutit, paralizë politike. Dhe tani kjo valë e fundit e konfliktit që ka shkaktuar një dëm të tillë në infrastrukturën civile në të gjithë Libanin. E pashë rëndësinë e asaj që po bënte agjencia palestineze e refugjatëve. Arsimi, shëndetësia, mjetet e jetesës.”, theksoi nënsekretari i përgjithshëm për çështjet humanitare dhe koordinatori i ndihmës emergjente Tom Fletcher.

 

Situata në Sirinë fqinje nuk është më e mirë. Pas gati 14 vitesh luftë civile midis forcave të ish-presidentit Al-Assad dhe grupeve rebele opozitare, qytetet dhe fshatrat siriane janë shkatërruar rëndë. Qytetarët u kthyen në vendlindje, por gjetën vetëm rrënoja.

 

“Nuk ka asnjë pikë referimi apo gjurmë të shtëpisë.”, u shpreh një sirian që u kthye në Damask.

 

“Kam qenë në paraburgim për 12 vjet. Më liruan dhe erdha në shtëpinë time në Kabun, por nuk e gjeta.”, u shpreh një i burgosur i liruar.

 

Autoritetet siriane vazhdojnë me emërimet në pozitat më të larta në qeverinë tranzitore.