Polici që hodhi flamurin shpallet i pafajshëm, Toshkovski: Nuk është konstatuar shkelje

 

“Një hetim është hapur nga Departamenti i Kontrollit të Brendshëm të MPB-së. Në kuadër të veprimeve hetuese – nuk është konstatuar se personi ka bërë shkelje të një procedure në MPB. Me këtë mbyllet procedura për zyrtarin policor.”, - deklaroi ministri i Punëve të Brendshme, Pançe Toshkovski.

 

 

Këtë vendim BDI-ja e quan skandaloz, ndërsa thonë se pafajësia e policit huligan nga Kumanova është akt i turpshëm dhe një shenjë e qartë e legalizimit të diskriminimit ndaj shqiptarëve në Maqedoninë e Veriut.

 

“Ky veprim tregon dështimin total të institucioneve për të mbrojtur dinjitetin e shqiptarëve dhe për të garantuar respektimin e të drejtave themelore. Përgjegjësia për këtë situatë nuk mbetet vetëm tek hakmarrja etnike apo tek ministri Pançe Toshkovski, por edhe tek përfaqësuesit shqiptarë brenda Qeverisë, të cilët me manipulimet e tyre të vazhdueshme dhe premtimet e rreme kanë tradhtuar interesat e shqiptarëve. Zëvendësministri dhe përfaqësuesit shqiptarë të zgjedhur nga VMRO-DPMNE-ja, që sot janë pjesë e kësaj qeverie, kanë treguar paaftësi totale për të përfaqësuar dhe mbrojtur komunitetin e tyre, duke u bërë garantues të padrejtësisë dhe diskriminimit.”, thonë në BDI, duke shtuar se heshtja e tyre përballë këtij akti dhe shumë veprimeve të tjera diskriminuese është një turp i madh dhe një tradhti ndaj interesave kombëtare të shqiptarëve. Përndryshe, gjatë incidenteve më 28 nëntor policia pate arrestuar dhjetëra persona.