Izraeli dhe Hamasi “grinden” për detajet e armëpushimit

Izraeli dhe Hamasi po grinden për detajet e një marrëveshjeje të mundshme për të ndalur luftën e Izraelit në Rripin e Gazës dhe për të kthyer pengjet në shtëpi, pasi zyrtarët palestinezë thanë se bombardimet e intensifikuara izraelite kanë vrarë më shumë se 100 njerëz gjatë fundjavës.

Një zyrtar i Hamasit ka thënë se grupi ka miratuar një listë me 34 pengje izraelite që do të ktheheshin si pjesë e një marrëveshjeje që mund të çojë përfundimisht në një armëpushim. Por, zyra e kryeministrit izraelit, Benjamin Netanjahu, ka lëshuar me shpejtësi një deklaratë të dielën duke thënë se Hamasi nuk e ka ofruar një listë të tillë.

Një shtytje e madhe është duke u zhvilluar për të arritur një armëpushim në luftën e Izraelit në Gazë përpara se presidenti i zgjedhur i ShBA-së, Donald Tramp, të marrë detyrën më 20 janar.

"Ne duam shumë ta çojmë këtë në vijën e finishit në dy javët e ardhshme, kohën që na mbetet.”, ka thënë sekretari amerikan i shtetit në largim, Antoni Blinken, në një konferencë shtypi në Korenë e Jugut të hënën.