Shqipëri, rrugët kombëtare janë të hapura, por jo edhe ato lokale

 

Rrugët kombëtare janë të hapura, por jo ato rurale ku dëbora shkon deri në 1 metër. Vazhdojnë të mbeten në izolim fshatrat e Dibrës. Në bashkinë Bulqizë të bllokuar kanë mbetur banorët e disa fshatrave, ndërsa shkollat në këto zona vazhdojnë të jenë të mbyllura, ndërsa ka dhe mungesë të energjisë elektrike.

 

Edhe në Kukës, reshjet e dëborës kanë ndaluar dhe energjia është rikthyer në disa zona, por problem mbeten fshatrat e thellë, të cilat nuk kanë komunikim me rrugët nacionale. Ndërkohë mbetet i pezulluar mësimi në 37 shkolla.

 

Në Qarkun e Korçës gjatë ditës së sotme s’ka reshje dëbore, por temperaturat kanë zbritur në -7 gradë. Të gjitha akset nacionale janë të kalueshme, ndërsa vazhdon kriposja e tyre. Ka ende probleme me energjinë në disa zona, ndërsa sa i përket rrugëve të fshatrave bëhet me dije se janë të bllokuara nga dëbora, fshati Miras i Devollit dhe fshatrat e Pogradecit.

 

Kreu i Emergjencave Civile, Haki Çako, tha se po përmirësohet situata në Vlorë, e cila u përmbyt dy ditë më parë.