Botë
Kosovë – Serbi, Komision i përbashkët për personat e zhdukur
15.01.2025 11:11
Në Bruksel po zhvillohet takimi i parë i Komisionit të përbashkët të Kosovës dhe Serbisë për të pagjeturit...
Në Bruksel po zhvillohet takimi i parë i Komisionit të përbashkët të Kosovës dhe Serbisë për të pagjeturit. Ngritja e këtij komisioni është bërë në bazë të një marrëveshjeje të arritur vitin e kaluar në kuadër të dialogut për normalizimin e raporteve mes Kosovës dhe Serbisë, që ndërmjetësohet nga Bashkimi Evropian, për zbatimin e Deklaratës për Personat e Zhdukur.
Sipas Kryqit të Kuq, në Kosovë janë ende 1.612 persona të pagjetur nga lufta. Në takim, delegacioni i Kosovës po udhëhiqet nga Halil Cenaj, ka bërë të ditur kryetari i Komisionit qeveritar për Personat e Zhdukur, Andin Hoti.
Sipas burimeve në BE, në këtë takim nuk pritet ndonjë veprim konkret, por do të jetë më shumë i karakterit simbolik dhe ceremonial, duke qenë se do të jetë takimi i parë i këtij komisioni. Po ashtu, fakti që Kosova është në periudhë të fushatës zgjedhore, ndikon që ky të jetë vetëm një takim simbolik. Burimet në Bruksel thanë se takimi do të jetë rast që palët të paraqesin prioritetet e tyre dhe të merren vesh për datat e takimeve të ardhshme, në të cilat priten rezultate konkrete.