Karnevali i Vevçanit, ASh: Shfaqjet janë më të rënda se vet sulmi

 

“Dje ishim dëshmitarë të pamjeve të rënda dhe shqetësuese nga Karnevali i Vevçanit ku në formë më të rëndë, morbide dhe skandaloze ironizonin me ngjarjet e 27 prillit dhe tentimi për vrasjen e kryetarit të ASh-së, Zijadin Sela. Ne e kuptojmë edhe folklorin, edhe satirën, por nuk lejojmë të bëhet satirë me tragjeditë personale dhe me ngjarje të rënda që paraqesin në vete një akt terrorist, e aq më pak kur tallja bëhet me viktimën.”, - deklaroi Isen Shabani nga ASh.

 

 

Ndërkohë nga Bashkimi Demokratik për Integrim thonë se kjo është një shkelje e rëndë e dinjitetit njerëzor dhe një provokim i rrezikshëm për paqen dhe stabilitetin shoqëror.

 

“Bashkimi Demokratik për Integrim dënon me ashpërsi aktin e papranueshëm të talljes dhe satirizimit të tentativës për vrasje ndaj Ziadin Selës, i cili ndodhi gjatë Karnevalit të Vevçanit. Kjo është një shkelje e rëndë e dinjitetit njerëzor dhe një provokim i rrezikshëm për paqen dhe stabilitetin shoqëror. Është e paimagjinueshme që një ngjarje kaq serioze, që ka tronditur shumë qytetarë dhe që ka lënë pas pasoja të rënda për jetën e individëve, të përdoret si objekt talljeje dhe urrejtjeje në një aktivitet publik.”, thuhet në komunikatën e BDI-së.

 

Nga ASh dhe BDI kërkojnë nga autoritetet kompetente, por edhe faktorët politik, që t’i ndëshkojnë veprimet e tilla, sepse të njëjta prekin ndjenjat e një populli të tërë dhe se personat që shfaqën këtë vepër duhet të marrin dënimin e merituar.