Këshilli Gjyqësor, gjykatësi Enver Bexheti, akoma gjykatës

 

“Kolegu është akoma gjykatës. Në Këshillin Gjyqësor po procesuohen më shumë procedura kundër gjykatësve, megjithatë nuk mund t’i publikoj emrat e atyre kolegëve duke pasur parasysh se ato procedura janë të fshehta. Jo që unë apo Këshilli Gjyqësor nuk duam t’i zbulojmë, megjithatë ligji e ndalon t’i publikojmë. Mënyra e vetme që këto emra apo procedura gjyqësore të jenë publike është vetëm nëse ata gjykatës kërkojnë që procedura të jetë publike.”, - deklaroi kryetari i Këshillit Gjyqësor, Aleksandar Kambovski.

 

 

Shkarkimin e paralajmëruar të kryeministrit ndaj pesë anëtarëve të Këshillit Gjyqësor, për shkak të besimit shumë të ulët të qytetarëve në gjyqësor, Kambovski nuk e sheh si presion mbi punën e Këshillit Gjyqësor.

 

“Ne jemi pushtete të ndryshme. Siç e dini, sipas Kushtetutës, pushteti është i ndarë në: ligjvënës, ekzekutiv dhe gjyqësor. Është normale që mes këtyre pushteteve të ketë komunikim, ndonjëherë edhe mosmarrëveshje. Secili punon në lëminë e tij dhe secili punon në pajtueshmëri me ligjet dhe Kushtetutën. Nëse kritikohen pushtetet mes veti unë nuk e vlerësoj si presion. Secili punon në suaza të kompetencave të tija.”, - theksoi kryetari i Këshillit Gjyqësor, Aleksandar Kambovski.

 

Ditë më parë kryeprokurori Ljupço Kocevski tha se ndaj Bexhetit po zhvillohet procedurë parahetimore. Ai u gjend në Listën e zezë Amerikane për përfshirje në korrupsion të nivelit të lartë, për marrjen e ryshfetit në lidhje me procedurën gjyqësore ndaj ish-drejtorit të DSK-së, Sasho Mijalkov. Deri më tani Këshilli Gjyqësor ka gjobitur Bexhetin me ndalesë në pagë për 6 muaj nga rroga 20%, për shkak të mbajtjes në sirtarë të lëndëve që kishin të bëjnë me përgjimet për më shumë se nëntë muaj.