Aksident trafiku, humbi jetën një 22-vjeçare, shoferit i hiqet liria

 

Sipas njoftimit të Ministrisë për Punë të Brendshme, prokurori publik ka bërë hetime, janë kërkuar pamjet video-vëzhguese, është urdhëruar kryerja e obduksionit të trupit të viktimës, si dhe ekzaminimi i gjakut dhe urinës së shoferit 20-vjeçar.

 

“Nga plagët e marra, F.K. ka vdekur në vendngjarje, ndërsa vdekjen e ka konfirmuar një mjek nga Shërbimi i Ndihmës Mjekësore Emergjente. Pas ngjarjes tragjike, një ekip nga Sektori i Punëve të Brendshme të Shkupit dhe një prokuror publik kryen hetime dhe lëshuan një urdhër që trupi të dorëzohej për obduksion.”, thuhet në kumtesën e MPB-së.

 

Procedurat hetimore dhe masat ligjore do të vazhdojnë, ndërkohë 20-vjeçari V.J. është privuar nga liria menjëherë. Autoritetet kompetente njoftojnë se pas dokumentimit të plotë të rastit do të ngrihet padi penale për të.

 

Ky rast tragjik e thekson edhe njëherë nevojën për kujdes të shtuar në trafikun rrugor, veçanërisht gjatë orëve të natës. Autoritetet bëjnë thirrje për të gjithë shoferët që të respektojnë shpejtësinë e lejuar dhe rregullat e trafikut, në mënyrë që të parandalohen ngjarje të tilla të dhimbshme.

 

Tre vjet më parë, më 20 janar 2022, në të njëjtin bulevard humbi jetën një vajzë 24-vjeçare nga Radovishi, ndërsa një djalë që ishte me të u plagos, kur një automjet i përplasi ata derisa po kalonin në kalimin e këmbësorëve pranë qendrës tregtare “City Mall”.