Osmani: Kosova e përgatitur për sfidat e sigurisë

 

“Në një kohë kur kërcënimet ndaj sigurisë janë më komplekse se kurrë, nga luftërat konvencionale, te luftërat hibride dhe sfidat kibernetike, Kosova duhet të jetë e gatshme për sfidat me të cilat ballafaqohemi sot dhe për ato të së ardhmes. Na duhet një arkitekturë sigurie që është inovative, fleksibile dhe e përgatitur për t’u përballur me secilin skenar. Në këtë linjë forcimi i kapaciteteve tona mbrojtëse, si dhe integrimi në NATO janë të ndërlidhura fuqishëm njëra me tjetrën. Zhvillimi i FSK-së, sipas standardeve më të larta të NATO-s, mbetet prioriteti ynë strategjik e kombëtar.”, - deklaroi presidentja e Kosovës, Vjosa Osmani. 

 

Viteve të fundit janë bërë hapa të rëndësishëm për forcimin e qëndrueshmërisë kombëtare, ka thënë me këtë rast kryeministri, Albin Kurti, sipas të cilit qëndrueshmëria është aftësia për të parashikuar, përballuar e rimëkëmbur nga çdo goditje, qofshin ato fatkeqësi natyrore, akte të qëllimshme kundër infrastrukturës kritike apo sfida të tjera që vënë në rrezik qytetarët e Republikës dhe sovranitetin e shtetit.                   

 

“Republika e Kosovës vazhdon që të gjitha përpjekjet e saj t’i bashkërendojë, e t’i bëjë këmbëngulëse në drejtim të anëtarësimit në NATO. E në këtë drejtim qëndrueshmëria, siç përkufizohet edhe nga NATO-ja është aftësia për t’u përgatitur për të rezistuar, për të reaguar e për t’u rimëkëmbur shpejt nga goditjet dhe ndërprerjet.”, - theksoi kryeministri i Kosovës, Albin Kurti. 

 

Këto komente, Osmani dhe Kurti i bënë në konferencën me temë “Qëndrueshmëria Kombëtare – Sfidat dhe Rruga Përpara”, të organizuar nga Ministria kosovare e Mbrojtjes.