Vazhdojnë reagimet për çmimet, LSDM: Pushteti shkatërroi standartin

 

“Në tetë muajt e kaluar, Qeveria e ka shkatërruar në tërësi standardin jetësor të qytetarëve. Çmimet në market rriten pa kontroll ndërkaq pagat stagnojnë. Shporta konsumatorë gjithnjë e më shumë po shtrenjtohet ndërkaq qytetarët janë lënë që të ballafaqohen vetë me krizë ekonomike të paparë.”, tha nënkryetarja e LSDM-së, Kaja Shukova.

 

 

Ndërkohë kryeministri Mickoski siguron se terreni i tregut është vënë në kontroll nga institucionet relevante dhe javës së ardhshme do të del para opinionit me raport të regjistruar nga kontrollet e marketeve.

 

“Po bëhet analizë e detajuar ndërsa të hënën me opinionin do të mund të shpërndajmë më tepër informacione, por mund të them se një pjesë e asaj për të cilën shqetësoheshim u bë realitet dhe e vërtetë. Po veprojmë dhe do të angazhohemi si qeveri, sepse e kemi obligim ta mbrojmë standardin e qytetarëve, por njëkohësisht pa e prishur ekonominë dhe rregullat e tregut.”, tha kryeministri Hristijan Mickoski.

 

 

Nga koalicioni VLEN ndërkohë thonë se kujdesen për mirëqenien e qytetarëve dhe nëpunësve, duke vënë theksin në sektorin shëndetësor.

 

“Koalicioni VLEN si shpresë për mundësi të reja u kushton rëndësi të madhe gjitha fushave që tangojnë qytetarët tanë, e në veçanti kujdesit shëndetësor. Me rritje të pagave ndaj mjekëve dhe punonjësit shëndetësor, ne motivojmë ata që të përkushtohen edhe një herë më shumë me vullnet të plotë dhe hamendje në shërbim energjik e me rezultate të mira ndaj qytetarëve tanë.”, thonë nga VLEN.

 

Sa i përket bojkotit të marketeve koalicioni VLEN nuk mohon se kanë përgjegjësi institucionale ndërkaq raportojnë se kanë marrë edhe masa, gjersa BDI-ja ka kërkuar normalizimin e çmimeve dhe dorëheqjen e ministrit të ekonomisë.