Netanjahu në ShBA diskuton armëpushimin e Gazës me Trampin

 

Negociatat për fazën e dytë do të fillojnë në Uashington, DC të hënën, tha zyra e Netanjahut të dielën, ndërsa lideri izraelit u nis për në ShBA.

 

Presidenti amerikan, Donald Tramp, i cili ka marrë meritat për marrëveshjen e armëpushimit të nënshkruar më 19 janar, pritet të presë Netanjahun në Shtëpinë e Bardhë të martën. Ky do të jetë takimi i parë i Trampit me një udhëheqës të huaj që nga inaugurimi i tij më 20 janar.

 

Zyra e Netanjahut tha se udhëheqësi izraelit do të fillojë diskutimet me të dërguarin e Trampit për Lindjen e Mesme, Stiv Uitkof, të hënën në lidhje me kushtet për fazën e dytë të armëpushimit.

 

Faza e dytë pritet të mbulojë lirimin e robërve të mbetur dhe të përfshijë diskutime për një fund më të përhershëm të luftës.