Zgjedhjet lokale dhe kalkulimet, Neziri: Partitë i bashkon pragmatizmi

Edhe pse na ndajnë disa muaj deri në zgjedhjet lokale, kalkulimet mes partive për koalicione të mundshme duket se kanë filluar, madje po përzgjedhin edhe kandidatët për garën e të parit të komunës.

Kush me kënd do të bashkëpunojë në zgjedhjet lokale, për analistin politik Xhelal Neziri mund të jenë parti të ndryshme që nuk i bashkon ideologjia por pragmatizmi dhe interesat konkrete të qytetarëve.

“Koalicionet mbietnike sidomos kanë ndodhur në raundin e dytë të zgjedhjeve për kryetarë komunash ku në komunat me shqiptarët pakicë kanë mbështetur një kandidat të partisë maqedonase dhe e kundërta, ku maqedonasit kanë qenë pakicë, përherë kanë mbështetur kandidat shqiptar dhe pikërisht këto votat e etnive pakicë kanë qenë vendimtare për atë se kush do t’i drejtojë komunat për katër vjet.” – tha analisti politik, Xhelal Neziri.  

Bashkëpunimet mes partive dalin në sipërfaqe më së shumti në raundin e dytë të zgjedhjeve, kur gara ngushtohet vetëm për kryetar komune, thotë Neziri.

“Çdo koalicion është i mundshëm, çdo lëvizje është e mundshme, si në taborin e pushtetit poashtu edhe në taborin opozitar dhe e gjithë kjo do të jetë garë interesante, garë e cila më pastaj nuk do të jape vetëm rezultatin se kush do t’i udhëheq komunat në katër vitet e ardhshme por do të jetë edhe një tregues për vetë pozicionin e partive politike në nivel shtetëror.” – u shpreh analisti politik, Xhelal Neziri.

Ndryshe, partnerët e koalicionit qeveritar, VMRO – DPMNE -VLEN, nuk mohojnë planifikim të përbashkët në zgjedhjet lokale të vjeshtës, me proporcionalitet për këshilltarët, ndërsa nuk ka zëra për ndonjë bashkëpunim mes opozitës shqiptare dhe asaj maqedonase.

Kjo e fundit ditë më parë ka thënë se me BDI-në kanë përvojë të hidhur, e cila nuk u i inkurajon për bashkëpunim të mëtejshëm politik. (Nermin Mulaki, TVM2)