Kumanovë: “FRI” dhe “Vllaznia” me aktivitete humanitare

Për nder të muajit të shenjtë të Ramazanit dhe me qëllim për t’u dalë në ndihmë sadopak qytetarëve të rrezikuar nga gjendja e vështirë sociale, edhe gjatë këtij Ramazani, Forumi Rinor Islam në bashkëpunim me Shoqatën Edukative “Vllaznia”, po realizojnë aktivitetin human “Shporta e Ramazanit”, shporta këto me gjëra ushqimore e higjienike, në vlerë prej 1.500 denarëve e të cilat realizohen falë donacioneve të mbledhura në pikat e grumbullimit në qytetin e Kumanovës.

“Projekti që fillon që nga dita e parë e Ramazanit është Aktiviteti “Shporta e Ramazanit”, për të cilën bëj thirrje që qytetarët të angazhohen tek ky aktivitet të cilin e kemi në bashkëpunim me Shoqatën Edukative “Vllaznia”, ndërsa ne ndihmojmë në realizimin dhe aspektin logjistik të shpërndarjes së këtyre shportave ku parashihet të ndihmohen familjet në nevojë e që të mos mbeten jashta normalitetit edhe begatisë së Ramazanit” – tha Kryetari i FRI-Dega Kumanovw, Memedali Limani.

Nga Forumi Rinor Islam, apelojnë deri tek të gjithë qytetarët që të ndajnë nga buxheti i tyre me qëllim që familjeve në nevojë t’ua lehtësojnë këto ditë të vështira ekonomike e sociale.

Përveç aktiviteteve sociale, FRI do të realizojë edhe një sërë aktivitetesh kulturore.

“Viti i kaluar filloi me “Mozaikun Rinor” gjithashtu kemi projektin “Incept” ku i realizuam aktivitetet me nxënësit e shkollave të mesme, mbajtëm trajnime për rreth 6 javë, gjatë këtyre ditëve të rinjët kanë diskutuar tema të ndryshme si tema sociale, tema që ju ndihmojnë në ngritjen e tyre intelektuale dhe përgatijte për sfidat e tyre të ardhshme në jetë. Pastaj shkollën verore që e kemi realizuar, gjithashtu kampingjet që i kemi realizuar brenda FRI” – u shpreh Limani.

Ndryshe, Forumi Rinor Islam në bashkëpunim me Shoqatën Edukative “Vllaznia”,  edhe këtë ramazan rajonit tonë do t’i sjellë edhe programe të larmishme kulturore e artistike, si dhe do të organizohen iftare publike në sheshin e Kumanovës dhe në Likovë. (Fatlum Aqifi, TVM2)