Epopeja e UÇK-së, Osmani, Kurti dhe Konjufca, homazhe në Prekaz

 

“Ata luftuan shumë më gjatë sesa vetëm përgjatë viteve të luftës, duke u shndërruar kështu në emblemë të UÇK-së dhe njëkohësisht duke i shndërruar kullat e Jasharëve në simbol të kalasë së lirisë, e cila edhe sot e mbron Kosovën, e mbron lirinë, pavarësinë dhe sovranitetin e saj.”, - deklaroi presidentja e Kosovës, Vjosa Osmani.                           

                            

Kryeministri Kurti tha se tre brezat e Jasharëve, 59 persona gjithsej, rreth gjysma gra e fëmijë, u flijuan me 5-6 dhe 7 mars të vitit 1998 për çlirimin e Kosovës.

 

“Epopeja e UÇK-së i dha një hov të pandalshëm Kryengritjes së Armatosur dhe Luftës Çlirimtare. Shpërthyen demonstrata gjithëpopullore dhe solidaritet i paparë historikisht ndërmjet shqiptarëve në Ballkan, por edhe gjithandej në mërgatë, e njëkohësisht edhe u vetëdijesua dhe u ndërgjegjësua edhe publiku ndërkombëtar, edhe diplomacia botërore.”, - theksoi kryeministri i Kosovës, Albin Kurti.

 

Familja Jashari është krijuese e Ushtrisë Çlirimtare të Kosovës, deklaroi kryeparlamentari, Glauk Konjufca.

 

“Me çdo 5, 6 dhe 7 mars vijmë këtu të gjithë së bashku, krerët e institucioneve të Kosovës, ministrat dhe qytetarët për t’u përkulur para varreve të Jasharëve të rënë në vitin 1998, për arsye se familja Jashari është krijuese e Ushtrisë Çlirimtare të Kosovës, është esenca e UÇK-së.”, - u shpreh kryetari i Kuvendit të Kosovës, Glauk Konjufca.

 

Në shënim të Epopesë së Ushtrisë Çlirimtare të Kosovës, edhe qytetarë të shumtë kanë bërë homazhe në Kompleksin memorial "Adem Jashari" në Prekaz.