Kuvend, Ilaz refuzon të drejtojë Komisionin e sociales

 

“Nuk do të kryesojë me komisionin, për shkak të një familjari të sëmurë. Porosinë për seancën e mora nga Gashi të premten pasdite. Edhe po mos të kishin qenë shkaqet subjektive, unë nuk shoh arsye përse të kryesoj me komisionin duke u nisur nga fakti se si u votua interpelanca ndaj koleges Dauti”, është shprehur Ilas.

 

 

Nga zyra e kryeparlamentarit edhe përkundër mungesës, të cilën e paraqitën shkurtimisht pa dhënë shumë detaje, thonë se deputeti Ilas vazhdon të mbetet kryesues i komisionit.

 

“Morëm letër nga koordinatori i Frontit Evropian se deputeti Bejxhan Ilas do të mungojë në të gjitha aktivitetet e Kuvendit. Andaj shtyhet takimi i komisionit. Deri në këto momente nuk ka ndryshim të vendimit, sa i takon kryesuesit të komisionit.”, njoftojnë nga kabineti i kryeparlamentarit, Afrim Gashi.

 

 

Nga Fronti Evropian kërkojnë distancimin e kryeparlamentarit nga skenarët e partive maqedonase që nëpërmjet deputetit Ilas të jetësojë ligjin e të ashtuquajturve “branitella”. Deputeti i Frontit Evropian, Elmi Aziri, në një postim të tijin në rrjet ka propozuar kthimin e Dautit në krye të komisionit.

 

“Ne nuk do të dërgojmë propozim tjetër dhe nuk do të pranojmë asnjë lojë tjetër të errët që ka gatuar Gashi me padronët e tij për të kontrabanduar Ligjin për “branitellat”. I bëjmë thirrje që të mos provojë këtë ta bëjë as me ndonjë deputet tjetër duke e emëruar si kryesues.”, shkruan Aziri në profilin e tij në fejsbuk.

 

Nga VMRO – DPMNE thonë se duhet të respektohet rregullorja.

 

“Kuvendi punon sipas rregullores. Gjithçka që është në kuadër të rregullores do të duhet të zbatohet.”, - u shpreh deputeti i VMRO – DPMNE-së, Dragan Kovaçki.

 

Puna e Komisionit Parlamentar për Politikë Sociale është bllokuar për disa muaj, pasi ish-kryetarja e komisionit, Ilire Dauti, refuzoi të vë në rend dite propozim-ndryshimet e Ligjit për të ashtuquajturit “branitella”, me arsyetimin se në këtë ligj duhen të përfshihen edhe pjesëtarët e UÇK-së. Dauti u tërhoq nga detyra, pasi në janar shumica votoi mosbesim për mënyrën se si kishte drejtuar komisionin.