UNT me ligjeratë për historinë shqiptare, Schmitt: Historia shqiptare në sytë e akademisë ndërkombëtare

 

 

“Historia shqiptare mund t'u ofrojë historianëve që nuk janë me prejardhje shqiptare disa tema të rëndësishme. Për shembull, shqiptarët janë një popull, identiteti i të cilëve bazohet kryesisht te gjuha. Kjo është një gjuhë nga më të vjetrat, e cila u shkrua si gjuhë letrare dhe u përdor që nga shekulli XVI. Kjo mund të krahasohet me rastin e baskëve në Spanjë. Një temë tjetër është edhe integrimi i shqiptarëve në perandoritë dhe roli që ata kanë luajtur”, u shpreh prof.dr. Oliver Jens Schmitt nga Vjena.

 

Profesori universitar, Fatih Iseni, vlerësoi bashkëpunimin me studiues të njohur ndërkombëtarë, si Oliver Jens Schmitt, duke theksuar rëndësinë e sjelljes së perspektivave të reja dhe të thelluara në mësimdhënie dhe kërkime shkencore.

 

“Universiteti Nënë Tereza është i hapur dhe synojmë maksimalisht ta internacionalizojmë atë. Përpiqemi të sjellim para studentëve sa më shumë profesorë me renome botërore”, theksoi profesori universitar Fatih Iseni.

 

Oliver Jens Schmitt, si një historian dhe profesor zviceran, është i njohur për kontributin e tij në studimet mbi historinë e Ballkanit, veçanërisht ato që lidhen me shqiptarët. Ai ka botuar disa vepra të rëndësishme që trajtojnë tema si formimi i identitetit kombëtar shqiptar, historia e Kosovës dhe figurat kyçe historike si Skënderbeu.