Takimi Vuçiq-Sorensen, presidenti serb insiston për asociacionin

 

“Kam theksuar pengesat e vazhdueshme që po bën Prishtina në procesin e dialogut dhe kam përsëritur se formimi i Asociacionit të Komunave me Shumicë Serbe, pas 12 vitesh refuzimi nga ana e Prishtinës për ta zbatuar këtë obligim, është parakusht për fillimin e një normalizimi thelbësor të marrëdhënieve.”, citohet të ketë deklaruar presidenti serb Vuçiq, në deklaratën e lëshuar nga presidenca e Serbisë.

 

 Vuçiq po ashtu ka theksuar pritshmëritë që BE-ja të rrisë angazhimin e saj dhe të mbajë një rol të paanshëm në këtë proces, duke theksuar rëndësinë e zgjidhjes me kompromis. Javën e kaluar, Sorensen vizitoi Prishtinën, ku u takua me presidenten e Kosovës, Vjosa Osmani, kryeministrin Albin Kurti, kryenegociatorin Besnik Bislimi, si dhe me liderët e opozitës dhe përfaqësues të partive serbe. 

 

 

Nga Prishtina, Sorensen tha se pas vizitës në Beograd dhe Prishtinë do të bëjë një vlerësim se ku qëndron dialogu. Ndërsa zëdhënësja e Bashkimit Evropian, Anitta Hipper, ka deklaruar se rruga e të dyja vendeve drejt BE-së duhet të shkojë nëpërmjet dialogut.

 

“Kur bëhet fjalë për dialogun, ne jemi të përkushtuar që të shohim që rruga drejt BE-së për të dyja palët të shkojë nëpërmjet dialogu të lehtësuar.”, ka deklaruar zëdhënësja e Bashkimit Evropian, Anitta Hipper.